بمناسبة مسلسلات رمضان اللي معظمها (لو ماكانش كلها) عبارة عن ناس عمالة بتخون في بعض (بجد في إيه؟)، قولنا احنا كمان نتكلم عن الموضوع بس من ناحية تانية وفي سياق أكتر جدية لإن الناس قلبت الموضوع هزار وحقهم بصراحة عدد الخيانات اللي شوفناها في مسلسلات رمضان 2021 بس، ماشوفنهاش في حياتنا كلها! بس لإن الملف ده جاد جدًا وخطير، فهنتكلم عن التصرفات والأفعال اللي تُعتبر خيانة للشريك، واللي لازم نخلي بالنا منهم كويس علشان مانقعش فيهم.. لإن للخيانة أوجه وأشكال كتير غير الخيانة الجسدية.
المغازلة
مش لازم يكون في فعل صريح علشان نعتبره خيانة، ولكن مغازلة الأخرين أو الـ “flirting” اللي بيعمله بعض الناس، وهم مايقدروش يعملوا كده قدام شريكهم أو على علم إن دي حاجة هتضايقه لو عرفها، يبقى أكيد ده نوع من أنواع الخيانة. لإن الكلام الحلو وتبادل النظرات أو الـ “over touching” مش المفروض تكون بينك وبين أى حد تاني غير شريك الحياة.
تكوين مشاعر لشخص آخر من غير ما تصارحهم بالحقيقة
الإنسان بطبعه متقلب وللأسف المشاعر حاجة مش بإيدينا، ماحدش بيقرر إنه يحب حد أو إنه يبطل يحب حد. ولكن اللي نملكه هو تصرفاتنا تجاه المشاعر دي. لو حسيت إنك فقدت مشاعرك تجاه الشريك وإنك بدأت تكون مشاعر لحد تاني، يبقى من أقل حقوق الطرف الآخر هو إنه يعرف الحقيقة دي، بدل ما يستمر في علاقة كده كده هتنتهي، ويتصدم لما يعرف الحقيقة متأخر.. لإن ده بيقع تحت مسمى الـ emotional cheating أو الخيانة بالمشاعر.
الارتباط لغرض التسلية، من غير وجود نية لتطوير العلاقة بشكل جدي
النوع ده مش بيتضمن وجود شخص تاني، ولكن عنصر الكدب والتلاعب بمشاعر شخص آخر أكيد موجودين. لو في طرف واحد من العلاقة مقرر جوا نفسه إنه مش هيكمل وإن العلاقة دي مجرد “مرحلة” في حياته وهتعدي، وهو مش مفهم الطرف التاني بده وسايبه عايش في عالم لوحده وهو متصور إن العلاقة جدية وهتكمل للجواز، يبقى دي خيانة لثقة الشريك بكل ما تحمله الكلمة من معنى.
الكدب عن مكان تواجدك أو الناس اللي انت معاهم
احنا مدركين ومقدرين تمامًا إن كل شخص من حقه يكون عنده مساحته الشخصية وجزء من الخصوصية، ولكن لو مثلًا الشريك بيتضايق من وجود شخص معين، وانت تبقى متواجد معاه وتكدب لما تتسأل هل الشخص ده كان موجود ولا لأ.. يبقى دي خيانة. من حقك تتناقش على المبدأ وترفض إنك تخرج الشخص ده من حياتك، ولكن لو وافقت واتفقت مع الشريك على ده، يبقى مش من حقك تكدب عليه بعدين.
وجود شخص تاني بتحكيله تفاصيل خاصة، الشريك نفسه مايعرفهاش
مش كل الناس زىّ بعضها لما الموضوع ييجي للـ “opening up”ولكن من المفترض إن الشخص اللي انت مرتبط به يكون أقرب حد ليك ويعرف عنك أكتر من أى حد عادي. فلو انت مش قادر تعمل ده معاه ولكن في شخص تاني من نفس الـ gender بتقدر تفضفض له وتحكيله عن تفاصيل شريكك مايعرفهاش، يبقى هنا أكيد في حاجة غلط.
الخيانة الجسدية
طبعًا دي نقطة مش محتاجة لشرح، لإنه أشهر وأكتر نوع من أنواع الخيانة وضوحًا. واللي مالهاش أى نوع من أنواع المبررات مهما كانت الأسباب.