حاجات مضحكة في الشارع بتهون علينا حياتنا، بس ممكن في لحظة تاخد حياتنا نفسها. السواقة في شوارع المحروسة أغلب الناس تقريبًا فاكرينها “فهلوة” بس، هي ماشي لازم تعتمد على نسبة ذكاء لا بأس بيها، بس الفهلوة دي هتودينا في داهية، وبتخلّي السواقة أصعب حتى لو أنت بتسوق كويس. أفعال اللي حواليك للأسف بتأثر عليك وعلى الطريق كمان، وبيبقى اللي سايد هو إن السواقة في مصر وحشة بسبب أفعال صغيرة، ولما نتكلم فيها هنحس إننا بنطالب ببديهيات، ولو بطلنا نعملها، الدنيا هتكون أسهل بكتير، زيّ إيه؟
عدم استخدام الإشارات
هتدخل يمين أو شمال، سهلة، تدي إشارة بالاتجاه اللي أنت هتروحه علشان اللي وراك يعمل حساب ده، لكن ليه نعمل كده؟ لا طبعًا نمشي بعشوائية وبخطوات مش محسوبة ممكن لاقدر الله تتسبب في حوادث، بس معلش استحملنا علشان احنا مانزلناش الدنيا بإمكانية تنبؤ تحركات البني آدمين اللي حوالينا، ولا بنعرف نشم على ضهر إيدنا فمعلش إدينا إشارة أنت رايح فين.
دخول اليمين من أخر حارة على الشمال، والعكس
أسعد لحظة في حياتنا، بييجي على بالنا فيها حاجات كتير لو وقعت في إيدينا، لو الطريق كذا حارة، وفي اتجاه يمين أو شمال، وييجي واحد عبقري من أبعد حارة عايز يدخل في أخر لحظة ويعطل كل الحارات الباقية علشان هو افتكر الاتجاه اللي هو عايزه فجأة، أو بيعمل الحركة دي علشان فاكر إنها أسهل وأسرع، وده سبب أسوء. وياسلام لو وهو في طريقه للحركة الجميلة دي خبط في أي عربية حواليه، بتبقى أسعد لحظة على المكان كله.
كسر إشارات المرور
بنتكلم في بديهيات، صح؟ حاجات بنعلمها للأطفال، وحاجة طبيعية إننا ناخد بالنا من الإشارات في الشارع خصوصًا في مدن زحمة زيّ القاهرة. لو مالتزمناش بأبسط قواعد المرور وهي الإشارات، ازاي بنستغرب كمية الحوادث اللي بتحصل في شوارع عادية مش حتى على طرق سريعة؟
المشي عكس
حاجة بديهية أكتر من إشارات المرور، هو الشارع اتجاه واحد، بتتحدى قوانين الطبيعة كلها وداخل في عكس، هتكون مستني النتيجة إيه مثلًا؟ أقل حاجة خناقة جميلة كده تبتدي بيها يومك، وأنت بتعند مع اللي جاي من الناحية التانية علشان أنت مصمم إن عادي يعني في إيه ما نساعد بعضينا يا أخي.
الركنة صف تاني
تبقى ماشي عادي تلاقي الشارع زحمة والطريق واقف ساعة، ليه؟ علشان في شخص قرر إنه يركن صف تاني عكس المسموح بيه للركن في الشارع، واللي في أغلب الأحيان بتكون في يافطة تسد عين الشمس مكتوب عليها “الانتظار صف واحد”، واتعطل 50 ألف واحد بسببه.
تعدية الشارع على طريق سريع
دي بقى الحالة الوحيدة اللي السبب فيها مش اللي سايق، السبب فيها هما العباقرة اللي عقلهم بيقول لهم يعدوا الطريق الدائري على رجليهم، متخيل يعني إيه؟ أنت لو عندك 7 أرواح زيّ القطط مش هتضحي بيهم كده زيّ إنك ترمي نفسك قدام عربيات أقل واحدة فيها ماشية بسرعة 80.
في اختراع جميل جدًا توصلت إليه البشرية حديثًا، وهو كوبري المشاة، اللي اتعمل مخصوص علشان تعدي منه بكل سلام، ماتكسلش تطلعه وتضحي بحياتك علشان مكسل تطلع كام سلمة.
رمي الزبالة من شباك العربية
يعني سيبك من التشتت في السواقة اللي بتعمله لنفسك وللي حواليك، بس يعني خلاص مش قادر تستنى توصل المكان اللي أنت رايحه وتقف هناك عند أي سلة ترمي فيها اللي أنت عايزه؟ بلاش، مش قادر تدوّر على أي سلة حواليك وتقف عندها 10 ثواني ترمي اللي ترميه؟ مش دول اللي هيأخروك عن اجتماع مجلس الإدارة اللي أنت مستعجل تروحه يعني.
ده مش معناه إن كل مشاكل السواقة في مصر بسبب كده، أكيد في أسباب تانية كتير بتخلّي الموضوع شبه مهمة مستحيلة، لكن حبينا نتكلم عن الحاجات اللي في إيدينا إننا نصلحها وبسهولة، لو بس بطلنا “الفهلوة” في السواقة.