وجود حيوان أليف في حياتنا مهم جدًا لأسباب كتير، وبيساعدنا بطرق مختلفة، وبيغير الطريقة اللي بنعيش بيها، يمكن جزء من التغيير ده بيكون تحمل مسئولية حيوان أليف، ولو كانت المسئولية دي متعبة شوية فالحاجات التانية اللي بتيجي معاها بتهون المسئولية دي وبتخليها زيّ العسل على قلوبنا.
مصدر أمن للحب
وجود حيوان أليف حوليك بيكون مصدر مش بيخلص من حب بريء وصافي، علشان حيوانك الأليف هيحبك لمجرد إنك موجود جانبه، وبيحس بالحنية والطيبة اللي بتظهرهم في اهتمامك بيه، وتوفير أكله وإحتياجاته.
هتحس بالحب ده مع الوقت وهتتعلق بحيوانك الأليف وهتحس إنك مش قادر تتخيل حياتك من غيره، لإنه بيملى حياتك مشاعر وحب، لو كان كلب هتلاقيه بيتنطط وهو فرحان أوي كل ما يشوفك داخل من الباب.
وكمان الحيوانات الأليفة بسيطة جدًا ومن السهل إنك تخليهم مبسوطين ومستمتعين بحياتهم، هما عايزين أكل واهتمام وشوية حب صغيرين منك وكل حاجة هتبقى تمام.
مخرج أمن للحب
كل الحب اللي أي حيوان أليف بيدهولك هيخليك تحبه غصب عنك، وهتتعلق بيه أوي مع الوقت، وحبك لحيوانك الأليف بيساعدك تتواصل مع مشاعر الحب اللي جواك واللي ممكن تكون معقدة شوية ومش من السهل إنها تخرج لأي حد عند بعض الناس.
حبك لحيوانك الأليف بيكون مخرج أمن للحب ده، لإنك عارف إنه كائن بريء وبسيط ومش عايز منك حاجة غير إنك ترعاه وتاخد بالك منه وتحبه، وهو في المقابل هيخليك حياته كلها ومصدر سعادته، وهيكون وفي جدًا ليك لإنه حبه بريء وبسيط ومش معقد.
بيعلمنا المسئولية وجمال الرعاية
حتى المسئولية الخاصة برعاية حيوان أليف، رغم إن ممكن بعض الناس تستصعبها إلا إنها في الحقيقة واحدة من الأسباب اللي تخليك تفكر تربي حيوان أليف.
مسئولية تربية قط أو كلب أو عصفور أو سمكة أو أي حيوان أليف بتكون أبسط بكتير من تربية طفل، ولو مقبلين على الجواز وبتفكروا تخلفوا أولاد يبقى تربية حيوان أليف هو أهم تدريب على التربية ممكن تاخدوه.
تربيتهم بتعلمك إنك تشيل مسئولية حد تاني غير نفسك وتقلق على أكله وشربه والدكتور بتاعه وهل هما مبسوطين ولا لأ، وتاخد بالك من حياتهم ومن مشاعرهم، وده أهم تدريب ممكن تاخده في تربية طفل قبل ما تخلفه.
دعم معنوي
أي حيوان أليف بكل اللي بيوفره من حب سواء كمصدر للحب ده أو مخرج له، هو أكبر دعم معنوي ممكن تتخيله، هيساعدك تتجاوز محن كتير وتعدي أوقات مظلمة ممكن تحس فيها إن العالم صعب ومعقد، علشان الحب اللي بيدهولك حيوانك الأليف هو حب غير مشروط وبالتالي مفيش أي شك فيه، حتى لو كنت في أسوأ ظروفك المعنوية مش هتشك إن الكائن البريء اللي جانبك ده مش بيحبك.
بتنقذ حيوان من حياة صعبة
حياة الحيوانات في مصر مش سهلة خالص، ووجودهم في الشارع بيعرضهم لعذاب وخطر كبير، فلما تاخد حيوان معاك البيت وتربيه فأنت كده بتوفر عليه عذاب كبير ممكن كان يعيشه لو اتساب في الشارع.
وبتاخد ثواب على رعايتك له، لإن الرسول صلى الله عليه وسلم بيقول “عُذّبت امرأة في هرّة ، سجنتها حتى ماتت ، فدخلت فيها النار ؛ لا هي أطعمتها ، ولا سقتها إذ حبستها ،ولا هي تركتها تأكل من خشاش الأرض”.
وحديث تاني عن الرسول بيقول فيه إن امرأة دخلت الجنة علشان سقت كلب عطشان.
لما تنقذ حيوان مسكين من حياة خطر جدًا ممكن يجوع ويعطش ويمرض ويتعذب ويموت فيها موتة صعبة أوي، تخيل ثوابك عند ربنا هيكون إيه؟ أكيد هيكون ثواب كبير.
وعلشان الثواب يكمل بننصحك ماتشتريش حيوانات أليفة، دور على ملاجئ حيوانات أليفة حوليك وتواصل معاهم علشان تتبنى حيوان في ظروف وحشة ومحتاج حد ينقذه ضروري.
أهم ملاجئ الحيوانات اللي ممكن تتبنى منها حيوان أليف
جمعية إيسما
من أشهر ملاجئ الحيوانات، معروفة جدًا عند المهتمين بحقوق الحيوان بسبب سمعتها الكويسة ونشاطها المستمر والمتميز، لها ملجئين؛ واحد للكلاب في المنصورية والتاني للقطط في المريوطية. وبتطلب الجمعية دايمًا من الناس إنهم يتبنوا القطط والكلاب، وأحيانًا كتير بتطلب تبرعات.
جمعية إيساف
جمعية غير ربحية في منطقة شبرامنت في المريوطية، من أهم نشاطاتها توفير برنامج تأهيل لإنقاذ الحيوانات المريضة والمشردة والمتسربة، وبتوعي بطرق للسيطرة على حيوانات الشوارع بطرق إنسانية رحيمة زيّ التعقيم، بدل ما الناس تقتلهم أو تسممهم. والجمعية محتاجة تبرعات وزيارات للمساعدة.
جمعية لمسة الحياة
جمعية خيرية بيديرها فرنسيين مقيمين في القاهرة، وبتهتم الجمعية بالحيوانات اللي عندها إعاقات أو مريضة، لكن للأسف بتعاني الجمعية من قلة التبرعات رغم المجهود اللي بتبذله في الاهتمام بالحيوانات وعلاجها.
الجمعية المصرية لحماية حقوق الحيوان
بتهتم الجمعية بشكل رئيسي بتحسين حالة الرفق بالحيوان في المجتمع المصري، وجزء كبير جدًا من نشاطها بيختص بالحيوانات المشردة وتوفير علاج لهم، كمان بتشتغل على تعقيم الحيوانات، وأعلنت عن خطوات بسيطة وإجراءات سهلة لتبني الحيوانات من هناك.
ملجأ الحيوانات في الجيزة
بينظم الملجأ حملات توعية عن طريقة التعامل مع الحيوانات وعلاجها، وبينشر الوعي عن حقوق الحيوان في المجتمع المصري، وبيحارب فكرة قتل حيوانات الشوارع، وبيهتم برعاية الحيوانات المصابة أو المشردة، وبيرعى الحيوانات الكبيرة في السن وبيقدم برامج رعاية طبية وغذائية للحيوانات.
بيرحب بالزوار والتبرعات وممكن تتبنى حيوان من هناك وتتكفل بعلاجه ورعايته ومن غير ما تاخده معاك البيت.
جمعية بروك
موجودة في منطقة السيدة زينب، ومتخصصة في علاج الحيوانات المريضة أو المصابة، وبالذات الحيوانات اللي بتشتغل في حاجات متعبة زيّ حمير الكارو وكده، وبيحتاجوا تبرعات طول الوقت، وبيرحبوا جدًا بالزيارات، وممكن تتبنى حيوان من هناك وتتكفل بعلاجه ويفضل عندهم.