12 حاجة المصريين أول ناس اخترعوها
مصر تاريخها عظيم، والمصريين بيتفاخروا دايمًا بانحدار سلالتهم من الحضارة الفرعونية اللي كانت سابقة العالم كله بسنين. وعشان احنا دايمًا بنحتاج حاجة تفكرنا بماضينا، هتلاقوا هنا مجموعة من الابتكارات اللي ارتبطت بالحضارات المصرية المختلفة وعرفناها في مصر قبل العالم بأجمعه:
مستحضرات تجميل العيون (كحل وآي شادو) – 4000 ق.م.
المصريين كانوا من أول الناس اللي شهروا استخدام مستحضرات تجميل للعيون. بعض أوائل لوحات ألوان تجميل العيون بيرجع أصلها ل5000 سنة قبل الميلاد، وكانت أكتر الألوان الموجودة هي الأخضر (اللي كان بيتاخد وقتها أو بيستوحي من حجر المالكيت) والأسود (المستوحى من حجر الجالينا اللي بنلاقي خامته في معدن الرصاص).
نظام الكتابة الجدارية (بيكتوجراف) – 3200 سنة ق.م.
اللغة الهيروغليفية -واللي بدأت قبل حوالي 3000 سنة من الميلاد- بتمثل أول طريقة كتابة مبنية على تصوير الحروف والأصوات عرفها البشر وهي مكونة من حوالي 500 رمز مختلف.
فباستثناء اللغة المسمارية اللي ظهرت في بلاد ما بين النهرين في نفس الوقت تقريبًا، اختراع الكتابة في مصر سبق تطور حضارات العالم بآلاف السنين إلى أن ظهرت الكتابة الصينية في حدود 1200 ق.م.
ورق البردي – 3000 ق.م.
كان قدماء المصريين هما أول من استخدموا ما يشبه الورق للكتابة وهو المستخرج من نبات البردي اللي كان موجود بكثرة على ضفاف النيل في الوقت ده. وبحلول سنة 1000 ق.م. كانت مصر بتصدر ورق البردي لجميع دول غرب آسيا لأنه كان أفضل بكتير من ألواح الطين أو الصلصال اللي كانت بتستخدم لغرض الكتابة في البلاد دي.
تقويم سنوي ب365 يوم – 4000 ق.م.
المصريين القدماء كانوا بيستخدموا في الأصل تقويم سنوي ب360 يوم فقط، متقسمة على 12 شهر كل واحد 30 يوم بالظبط. لكن في حدود عام 4000 ق.م. زودوا خمس أيام علشان السنة تكون مماثلة في طولها للسنة الشمسية المكونة من 365 يوم. والجدير بالذكر إن التقويم الفرعوني المكون من 365 يوم (مع وجود سنة كبيسة كل حوالي 4 سنين) هو المعمول بيه حاليًا في معظم أنحاء العالم.
الجرافة المدفوعة بحيوان الثور – 2500 ق.م.
الأراضي المحيطة بنهر النيل كانت في العهد القديم كلها أراضي خصبة صالحة للزراعة، واللي سمح للمصريين بزراعة محاصيل كتير في الوقت دا من أهمها القمح ومجموعة كبيرة من الخضروات. الجرافة اللي انتوا شايفينها في الصورة دي كانت من أهم الابتكارات الزراعية في العصر دا لأنها سهلت الحياة كتير على المزارعين وخلت عملية ري الأراضي الزراعية أسرع وأسهل وبالتالي تحولت الزراعة لمهنة مربحة وتوسعت بشكل ضخم في السنين اللي بعدها.
مزيل رائحة الفم
للأسف المصريين قديمًا كانوا بيعانوا من مشاكل كتير مرتبطة بالأسنان (غالبًا بسبب بواقي الرمل اللي كان بيبقى موجود في الأكل من طواحين الصخر)، والدليل على دا هو وجود أسنان كتير متعفنة وخُرّاجات في جثث المومياوات المصرية القديمة. وعشان يحل المصريين القدماء المشكلة دي خاصًة مع الروايح اللي كانت بتسببها أسنانهم بسبب الأمراض دي اخترعوا حاجة شبه اللبان اللي بنستعمله لإزالة رائحة الفم واللي كان في الأصل كرات صغيرة معمولة من القرفة، البخور، نبات المر والعسل.
الحلاقة وقصات الشعر المختلفة (قصة الشعر النموذجية)
في مصر الفرعونية كان قص الشعر دوريًا للراجل والست هو عادة راسخة في المجتمع. ترك الشعر في أجزاء الجسم المختلفة كان علامة على البربرية وعدم النظافة بينما قص الشعر والاعتناء بالجسم كان دليل الأناقة. لما الرومان دخلوا مصر، احتقروا فكرة قص الشعر لدى المصريين لأنهم كانوا بيعتقدوا إن شعر الجسم هو علامة على الذكورة، وإن الراجل اللي من غير شعر في جسمه هو أكيد شخص عاجز.
الأقفال المصممة لفتحها بمفاتيح – 4000 ق.م.
القفل المتثبت في الباب بمسامير وفيه فتحة صغيرة بيدخل منها المفتاح فيفك القفل. الأقفال دي كانت متطورة جدًا في العصر دا، متطورة حتى عن الأقفال اللي تم اختراعها في روما القديمة بعدها بسنين طويلة؛ واللي كانت بتبقى جزء من الباب وأسهل بكتير في الفتح. ولحد يومنا دا، لسه البشرية بتستخدم نفس الطريقة في صنع الأقفال مع فرق المواد المصنوع منها الأقفال والمفاتيح وعشان كده فيه خدمات زي دي موجودة، كله بفضل المصريين القدماء.
فرشة الأسنان والمعجون – 5000 ق.م.
يمكن المصريين القدماء كان عندهم أمراض ومشاكل كتير في أسنانهم بسبب بواقي الصخر والرمل في الأكل، بس على الأقل حاولوا ياخدوا بالهم من سنانهم ويحافظوا عليها من الأمراض؛ فكانوا أول حضارة تستخدم فرش الأسنان والمعاجين (كان بيتم تصنيعها من قشور البيض وحوافر التيران) وكانوا بينضفوا سنانهم دوريًا كجزء من روتين حياتهم.
الأقلام المصنوعة من القصب والحبر الأسود – 3200 ق.م.
مش بس المصريين القدماء كانوا أول من اخترع أوراق البردي والكتابة، هما كانوا كمان أول من اخترع الحبر الأسود وعُرفوا كمان باستخدام أقلام القصب وشهروها. الحبر كان بيتم تصنيعه من المياه، السخام (أو بواقي الدخان) وصمغ الخضروات وسوائلها.
الباروكة
الباروكة أو الشعر المصنوع كان مشهور جدًا في مصر القديمة وبيستخدمه الرجال والسيدات سواء كلمحة جمالية أو لإخفاء الصلع. كانت الباروكات في الأصل مصنوعة من شعر حقيقي وبعدها ابتدوا يستخدموا في تكوينها ألياف النخل.
الكعوب العالية – 3500 ق.م.
بيرجع تاريخ أول صورة لاستخدام الكعب العالي في مصر لعام 3500 ق.م. وللحقيقة كانت الكعوب العالية في مصر القديمة بيلبسها النبلاء سواء من الستات أو حتى الرجال، في حين كان عامة الشعب بيمشوا حافيين. وكان الاستثناء الوحيد في دا هو الجزارين اللي كانوا بيلبسوا جزم بكعوب عالية علشان يقدروا يتحركوا بسهولة في وسط برك من الدماء اللي كانت بتنتج عن ذبح الحيوانات.