11×12: في عيد زواجهم الـ12، دول 11 عمل فني جمع يوسف الشريف وإنجي علاء

بيحتفل الفنان يوسف الشريف النهارده بمرور 12 سنة على زواجه من مصممة الأزياء والكاتبة إنجي علاء، اللي مش بس كانت رفيقة حياته كزوجة، ولكن كمان شاركته لسنوات طويلة في حياته المهنية، وكان اجتماعهم مع بعض سبب في نجاحات متتالية ليوسف الشريف في أعماله الدرامية. لإن إنجي علاء خريجة كلية إعلام قسم صحافة بالجامعة الأمريكية، وتخصصت في تصميم أزياء الشخصيات الدرامية والمؤثرات البصرية. علشان كده كان من الطبيعي إنها تشارك يوسف الشريف فأعماله، لخبرتها الطويلة في المجال ده، وإننا نشوف تطور دورها من تصميم ملابس العمل، لتأليفه. واحتفالًا بنجاحاتهم وعيد جوازهم، قررنا نسترجع الأعمال الفنية اللي جمعت بينهم على مدار السنين اللي فاتت.

المواطن إكس

بيرجع تعاون إنجي والشريف لسنة 2011 في مسلسل مواطن إكس فكانت إنجي ستايلست ومصممة ملابس شخصية يوسف الشريف في المسلسل.

رقم مجهول – زيّ الورد – اسم مؤقت

بعد نجاحهم مع بعض في مسلسل المواطن إكس، استمر يوسف في الاستعانة بزوجته كستايلست خاصة بيه في مسلسل رقم مجهول وزيّ الورد سنة 2012، وفي مسلسل اسم مؤقت سنة 2013 وظهرت كمان في المسلسل كضيفة شرف بشخصيتها الحقيقية كإعلامية.

الصياد – لعبة إبليس

بعد نجاحاتها في أعمال متتالية كستايلست، توسعت إنجي وبقيت مصممة أزياء وستايلست لشخصيات طاقم العمل كله في مسلسل الصياد سنة 2014. أما السنة اللي بعدها، فتوسعت أكتر وأكتر علشان مش بس تكون ستايلست فريق العمل للمسلسل، ولكن كمان تكون المؤلفة في مسلسل لعبة إبليس اللي تم عرضه في رمضان 2015، واتكرمت في مهرجان القنوات الفضائية كأفضل تأليف قصة درامية.

القيصر – كفر دلهاب

سنة 2016 شاركت إنجي زوجها في مسلسله القيصر، فكانت الستايلست ومصممة الخدع البصرية للعمل، وفي السنة اللي بعدها، رجعت إنجي للتأليف من تاني فكانت المؤلفة ومصممة الأزياء لمسلسل كفر دلهاب سنة 2017 واللي حقق نجاح كبير وقت عرضه.

النهاية

بعد غيابهم سنتين عن شاشة التلفزيون، رجعوا يوسف وإنجي عودة قوية بمسلسل النهاية سنة 2020، واللي كان متزامن مع وقت تفشي فيروس كورونا، علشان كده الناس كانت متحمسة وقتها إنها تتفرج وتعرف فكرة العمل. وفي المسلسل كانت إنجي برضه المؤلفة.

كوفيد-25

أما السنة دي فشوفناهم مجتمعين في مسلسل كوفيد 25، اللي كانت مؤلفته إنجي، علشان يكون ده العمل الـ11 اللي يجمع بين الزوجين.

آخر كلمة: كل سنة وانتم سعداء وناجحين مع بعض!

تعليقات
Loading...
Tweet
Share
Share
Pin