كل الجمهور متحمس ومستني فيلم (يوم 13) أول فيلم ثري دي رعب مصري في مصر والشرق الأوسط، صناع العمل اشتغلوا عليه فترة كبيرة ومستنين عرضه في العيد الصغير.
احنا اتكلمنا مع الفنان أحمد داود بطل العمل، وحكى لنا عن شعوره بعد ما الفيلم خلاص هيظهر للنور والناس هتشوفه وتحضره على شاشات السينما خلال فترة قريبة، وقال: “ده أول فيلم ثري دي في مصر والشرق الأوسط، وأنا متحمس جدًا للفيلم ومبسوط إن أخيرًا الفيلم هيتعرض في العيد الصغير، علشان تجربة جديدة وبقالنا كتير مستنينيه وشغالين عليه، وأنا متفائل واتمني إن شاء الله يعجب الناس وناخد على قد تعبنا، ودي تجربة محظوظ إني موجود فيها.. استنوا فيلم يوم 13”.
وعن عناصر البوستر عرفنا إن كل جزء وتفصيلة لها ملمح وعلامة، فنلاقي إن اللون الأزرق مسيطر على البوستر، والتصميم واللون ده بيرمز للموت والعوالم الميتافزيقية، واللون الأبيض بيشبه الضباب وبيدي إحساس بغموض القصر ده واللي بيحصل جواه، ورقم 13 اللي حامل عنوان الفيلم مرسوم على شكل مقص عليه نقط دم، كإنه سلاح جريمة وعليه دم الضحية.
الفيلم بطولة أحمد داود، دينا الشربيني، شريف منير، محمد ثروت، نسرين أمين، أروى جودة، أحمد زاهر، فيدرا، محمود عبد المغني، مجدي كامل، نهال عنبر، نهى عابدين، محمد الصاوي، وتأليف وإخراج وائل عبد الله.