بواسطة منة حسني.
الرحالة ياسين غلام هو شاب مغربي بيحب السفر والترحال، وعنده حلم إنه يسافر عبر مختلف القارات والبلاد علشان يكتشف الثقافات المختلفة، ويدونها في كتابه، وعلى صفحته على اليوتيوب.
بدأ ياسين رحلته حول أفريقيا سيراً على الأقدام سنة 2017، وبعد كده قرر إنه يكملها على دراجة هوائية بهدف إنه يوصل في النهاية للسعودية علشان يؤدي فريضة الحج، وبالفعل نجح السنة دي إنه يوصل للسعودية بعد رحلة ومغامرات دامت لمدة أربع سنين.
ومن المشاكل اللي واجهت ياسين خلال رحلته الطويلة، هو إنه كان هيصاب بمرض الملاريا، لولا إنه لقى العلاج الفوري، واتعرض لحادث سير في نيجيريا اتسبب في إتلاف دراجته.
وبالإضافة لصعاب السفر اللي كان بيتعرضلها ياسين حوالين أفريقيا، أزمة فيروس الكورونا والنزاعات في بلاد المنطقة اتسببت في إغلاق حدود بلاد كتيرة، واضطر إنه يروح السعودية عن طريق جنوب إفريقيا.
رحلة ياسين كان بيتم تمويلها عن طريق أعمال بسيطة في البلدان اللي بيعدي عليها زي إنه اشتغل مترجم من اللغة الإنجليزية للعربية، وميكانيكي، وكهربائي علشان يقدر يكمل رحلته للنهاية.
وبالرغم من نجاح ياسين في الوصول للسعودية في ميعاد الحج، مقدرش يؤدي فريضة الحج السنة دي بسبب فيروس الكورونا، بس في المقابل لقى ترحيب كتير من السعوديين اللي كانوا بيشجعوه طول فترة رحلته في المملكة، ووفروله كرفان متنقل علشان يقدر ينام فيه خلال رحلته، واتبرعوله كمان بتكاليف حجه السنة اللي جاية مع والدته وووالده.
ياسين قال إنه بيخطط لزيارة الأرجنتين الفترة الجاية، وهينطلق منها في جولة لاكتشاف بلدان أميركا اللاتينية.
