جموع الشعب بتتابع مسلسل (جعفر العمدة) السنة دي، حتى لو أغلبهم مش عارف إيه اللي مخليه يتابع المسلسل، حتى لو مش من جمهور محمد رمضان، حتى لو متوقع المسلسل وأحداثه، رغم كل ده بتلاقي نفسك متابع المسلسل ومستني تشوف الأحداث واندمجت في الحدوتة ومتحمس وحاسس إنك جزء من الحدث.
السؤال دلوقتي، هل جعفر العمدة هيلحق يخلص الأحداث -اللي متوقعينها- في التلات حلقات اللي فاضلين؟ السؤال ده اتطرح من الجمهور لما حسينا إن رمضان بيجري بنا ولسه الفنان مابدأش الانتقام من أعدائه اللي ظالمينه وجايين عليه، واحنا متعودين إن محمد رمضان بيبدأ انتقام من الحلقة 20 مثلًا، كده احنا اتأخرنا السنة دي.
حلقة امبارح كانت بتتكشف فيها مفاتيح وألغاز كلنا عارفينها، ما عدا جعفر العمدة نفسه، لكن مع ذلك لا لحقنا نفرح به وبرجوع ابنه، ولا لحقنا نفرح ونشمت وهو بينتقم من الأشرار.
وخلاص النهارده الحلقة 28، هيلحق ينتقم من عيلة فتح الله وخصوصًا دلال؟ ويضرب كارم وشوقي العلقة اللي الناس مستنياها من أسبوع؟ هل محمد سامي هيفاجئنا بنهاية غير متوقعة ومش هنلحق نتشفى فيهم زي ما مستنيين؟ كل ده هنشوفه في الحلقات الباقية.
الجمهور مستني الانتقام اللي متأخر ده، باللي متوقعينه من شخصية زي شخصية جعفر العمدة، اللي قدرت حكايته تشد الجمهور في موسم رمضان السنة دي وتجمعهم على عمل فني واحد يتابعوه ويتناقشوا فيه، تفتكروا إيه اللي هيحصل؟