هل تم إهمال القاهرة علشان تتبني العاصمة الإدارية الجديدة؟

قال الدكتور عاصم الجزار، وزير الإسكان، إنه في الوقت اللي بتبني فيه مصر عاصمة إدارية جديدة، بتشتغل برضه على تطوير عاصمتها الحالية، القاهرة، وأكد إن التطوير ده بيحصل من خلال برامج وجداول زمنية محددة للتطوير، زيّ مشروعات تطوير ماسبيرو ومجرى العيون، ووضح كمان إن اللي بيقول إن القاهرة مُهمَلة، كلامه مش حقيقي.

وأكد الجزار، في الجلسة الختامية للمنتدى البرلماني لحزب مستقبل وطن في مدينة الغردقة، يوم السبت، إن القاهرة هي التراث والتاريخ والحضارة، وقال إن العاصمة الإدارية الجديدة هتكون عاصمة الإدارة والاقتصاد والحكم.

ووضح إن الدولة حاليًا بتشتغل على اللي سماه “فض الاشتباك” و”إعادة ترتيب المشهد من الداخل”، وقال إن المفاهيم دي مهمة جدًا للشعب ولازم تكون واضحة للكل، وقال إننا ماينفعش ننسى إن القاهرة مزدحمة جدًا، وإن الدولة بتحاول تقلل الازدحام ده وتسهل الحركة على المواطنين والموظفين.

وأكد كمان إن العاصمة الإدارية الجديدة هي الخطوة الأولى لتنمية سيناء، ووضح إن تنمية طريق السويس والانتقال للشرق بيحاول يوصل الزحف العمراني والتنمية لسيناء.

وقال إن الدولة عندها خطط متكاملة وتفاصيلها واضحة علشان المشاريع دي تنجح، والدولة ماتعرفش طريق الفشل، وذكر مشروع “حياة كريمة”، وقال: “أنا برفض مصطلح الصعيد المهمل والمنسي.. والدولة حطت خطط لتنمية الصعيد على أرض الواقع”.

وقال وزير الإسكان: “الدولة بتواجه أي خلل بترصده في التنمية، وكمان بتواجه الخلل في التوازن بين الريف والحضر، لإن سيطرة التنمية في واحد منهم على حساب التاني هيسبب خلل اقتصادي وهينعكس على الأنشطة الاقتصادية بشكل كبير”، ووضح إن الدولة بترفض تحول كل المجتمعات لمستهلكيين بدل من إن المجتمعات المصرية تكون مُنتجة.

ووضح إن الدولة بتبني مناطق عمرانية علشان توفر حياة أفضل وتضمن للمواطن إنه يلاقي فرص عمل أحسن، وأضاف: “الجمهورية الجديدة مش كيان هلامي ولكن كيان حقيقي له ملامح حقيقية والكيان ده بيشتغل على إيجاد فرص حقيقية للتنمية”.

ومن المُنتظر إن العاصمة الإدارية الجديدة هتكون موقع جذب كبير للاستثمارات العربية والأجنبية وهتحقق نمو اقتصادي كبير للدولة، وهتقلل الازدحام في القاهرة، وهتديها الفرصة إنها تتحول لموقع ثقافي وأثري.

آخر كلمة: ماتفوتوش قراءة:  مباردة “اعرف تراثك وضع بصمتك” لنشر الوعي بالتراث المصري وحمايته

تعليقات
Loading...