النهارده بينطلق مؤتمر المناخ في القمة 27، اللي بتستضيفها مصر في الفترة من 6 لـ 18 نوفمبر، تحت رعاية وزارة البيئة المصرية ومنظمة الأمم المتحدة.
الحدث المنتظر بينطلق بموسيقى مصرية عالمية من تأليف الموسيقار هشام خرما ببصمة موسيقية مميزة، ده غير إنه كمان ألف الموسيقى التصويرية لفيلم المؤتمر الافتتاحي، اختيار هشام خرما علشان يكون الراعي للموسيقى الرسمية لحدث كبير ومهم زي ده كان مميز، حبينا نعرف منه أكتر عن اختياراته للمقطوعات الموسيقية للمؤتمر.
“حاولت أحقق مزيكا عالمية ولكن في نفس الوقت يكون فيها بصمة مصرية، فاستخدمت آلة العود والكولة عشان أدي طابعنا العربي” دي الفكرة الأساسية اللي خرما اعتمد عليها في تأليف المقطوعة الموسيقية، اللي شاركه فيها مجموعة من العازفين المصريين واتسجلت الوتريات خارج مصر، المقطوعة الموسيقية مدتها 3 دقايق، بتعتمد على موسيقى أوركيسترالية تبث الأمل، والأصوات واخدة طابع عصري وعالمي، لكن في الوقت نفسه ممزوجة بـالآلات الموسيقية الشرقية والعربية.
كمان شاركت بالغناء في المقطوعة الموسيقية دي المطربة العالمية “كلارا سوليس” اللي قدمت الموسيقى النصويرية للعبة المشهورة “Assassin’s Creed Valhalla” وكمان شاركت في غناء إعلانات رسمية عالمية زي مسلسل “La Casa de papel”.
هشام خرما موسيقار مصري عالمي اتأثر بثقافات مختلفة، وانعكست على الموسيقى اللي بيقدمها، فبقينا نشوف موسيقى بطبع مميز بيجمع بين خلفيات مختلفة، كمان اتعاون مع موسيقيين عالميين، خرما بدأ مشواره في الموسيقى التصويرية لأعمال سينمائية ودرامية من 2019، زي مسلسل “النهاية” وفيلم “ماكو” في 2020، والموسيقى التصويرية لمسلسل “سوتس بالعربي”.
أما عن شغله في أحداث كبيرة أو مؤتمرات، عزف الموسيقى التصويرية لافتتاح وفعاليات منتدى شباب العالم في دورته التانية اللي انطلقت في مصر في شرم الشيخ سنة 2018، كمان شوفناه في افتتاح مهرجان القاهرة للدراما في دورته الأولى السنة دي.