الدنيا اتقلبت على السوشيال ميديا من كم ساعة لما حلا شيحة نزلت بوست على الإنستجرام بتاعها وهاجمت فيه تامر حسني بسبب دورها في فيلم “مش أنا” اللي لسه نازل في السينما من كم يوم.
وفي البوست ده قالت حلا شيحة:
أنا اتفاجئت جدًا بنزول كليب يجمع فيه مشاهد متفرقة من الفيلم في أيام ذي الحجة أيام مباركة وخصوصًا بعد أخر بوست نزلته ووضحت فيه أنا إيه ..
واتفاجئت أكتر خصوصًا بعد وعد تامر حسني ليا وتأكيده إنه هيحترم رغبتي وبعض الطلبات اللي طلبتها منه بكل احترام وود الصيف اللي فات وأكدلي إنه هيحترم رغبتي ..
احنا يمكن نجحنا بمقاييس الدنيا بس صدقوني بمقاييس ربنا احنا لم و لن ننجحأنا عارفة و متأكدة إن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح
فيلم “مش أنا” هو فيلم صَورته حلا شيحة مع تامر حسني من سنة ونص، وبسبب ظروف الكورونا اللي العالم كله كان بيمر بيها، وماقدروش ينزلوا الفيلم غير دلوقتي.
ومع إعلان الفيلم ونشر بوستراته، نزل تامر حسني أغنية “مش أنا” واللي عمل الفيديو كليب بتاعها من مشاهد متفرقة من الفيلم اللي كان من بطولة حلا شيحة.
بعض المشاهد في الفيديو كليب المأخوذة من الفيلم فيها حميمية بينها وبين تامر حسني وهي مش متقبلة إنها تشوف المشاهد دي خصوصًا بعد ما نزلت بوست قبل كده بتقول فيه إنها تابت عن المشاهد دي، وقالت إن تامر حسني وعدها الصيف اللي فات إنه هيحذف المشاهد دي وهي دلوقتي مصدومة إنها شايفاها على الشاشة وإنه ماحذفهاش.
بتكلم من قلبي الكليب ده مايرضيش ربنا وأنا عيطت لإني شفت نفسي في المشاهد دي.. دي كانت زلة نتيجة ظروف مريت بيها وكلنا بنغلط ولازم نغلط علشان احنا بشر بس المصيبة إننا بنغفل وبننسى..
أنا مش هتكسف من حد أنا تبت من المشاهد دي وهي لا تصح وأنا غلطت وبصلح وأهم حاجة إن ربنا يرضى عني لإن في الأخر ده اللي هينفعنا مش الشهرة ولا النجاح لا هو مش نجاح أصلًا علشان النجاح الحقيقي حاجة تانية خالص احنا أغلبنا ناسيينها إلا القليلين مننا.
الفن لو بيخلينا نبعد عن منهج ربنا ومانبقاش قدوة لولادنا يبقى باطل و مايبقاش فن
احنا كلنا عندنا امتحان في الدنيا دي وحابة أفكرك بالفيديو ده يا تامر اللي قولت فيه أنا مش بتمنى أموت وأنا مطرب أنا دايمًا خايف من كده.. كلام أكيد قولته في لحظة صدق جواك و جوانا كلنا
وكملت في البوست وفكرت تامر حسني لما كان مع إنجي علي في 2007 وقال إنه يتمنى مايموتش وهو بيغني، وقالت إن تامر في الوقت ده كان بيتكلم في لحظة صدق وضعف، وفكرته باللحظة بلينك الفيديو على اليوتيوب.
وكملت تعليقًا على الفيديو ده وقالت:
شوفه تاني يمكن يفكرك إن جواك أكيد في صراع وأنا وكلنا
كلنا بنغلط بس المهم في الأخر نتدارك الغلط ونصلح .{إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا}.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد.
هجوم الفنانين على حلا شيحة بسبب أخر بوست على الإنستجرام
علق المخرج محمد العدل على صفحته على الفيسبوك على بوست حلا شيحة وقال:
ياريت بس لما تتطلقي ماترجعيش تقولي عايزة أمثل تاني يا أستاذة حلا
والتعليق ده فيه مرجع على جوازة حلا شيحة من معز مسعود في شهر فبراير اللي فات.
وجيه تعليق راندا البحيري على صفحتها على الفيسبوك:
هو ماحدش قال لحلا ان باب التوبة مش موجود على الإنستجرام؟
وصرحت إلهام شاهين لموقع في الفن وقالت:
كل واحد يعمل اللي هو عايزه.. هي عندها قناعات معينة وأفكار معينة وسابت الفن أصلًا.
أما والد حلا شيحة فصرح لموقع القاهرة 24 وقال:
مفيش فنان يعمل دور ويرجع يقول مش عايزه، حتى لو كانت بنتي
رد تامر حسني على بوستات حلا شيحة
بعد ما بوست حلا نزل على الإنستجرام بكم ساعة والفنانين ردوا عليها وحصل القلبان ده كله على السوشيال ميديا، أخيرًا نزل تامر حسني برد طويل ومتكامل على كل الكلام اللي حلا قالته، وقال تامر حسني:
نهاركم جميل يا أغلى الناس 🤍 الحقيقه عمري ما بتخيل إني أدخل في نقاش بالشكل دا مع زميل بحترمه و كان في بيننا كل خير .
للتوضيح بما إنك يا حلا كتبتي بوست وأشركتي الجمهور الكريم معانا بدل ما كنتي تكلميني شخصيًا ونتناقش بيني وبينك، فأنا مضطر أرد هنا برضه
….أولًا أنا عمري ما وعدتك إن الكليب مش هينزل ده ماحصلش أصلًا يا حلا مش أنا خالص اللي أوعد وأخلف….. الحقيقه إني احترمت كلامي معاكي ووعدتك أشيل مشاهد تانية طلبتيها وشيلتها بالفعل وشكرتيني عليها ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة، و بعدين الفيلم بقاله ٣ أسابيع في السينمات والكليب موجود جوه الفيلم هو بالنسبالك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي ؟؟؟؟ منطق غريب فعلاً يا حلا ، و بعدين هو مش أنتي اللي مضيتي عقد و تقاضيتي عليه مبلغ كبير عشان الدور دا بعينه !!!!! هو مش إنتي اللي صورتيه و مثلتيه بنفسك و بمنتهى الرضا ولاّ حد أجبرك ؟!!!!!! و للتوضيح للجمهور الكريم أنا و المخرجه الأستاذه ساره وفيق بعتنالك و كنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها ، ماكنتيش بتردي علينا و تليفوناتك كلها كانت بتقفل في وشنا ،، إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا و لو كان ليكي أي طلب تاني كنت هعمله بكل حب إنما إنتي فجأه أختفيتي و مكملتيش تركيب صوتك في الفيلم ولا جيتي تتصوري عشان آفيش الفيلم أصلًا و مخليتيناش نعرف نعمل آفيش مجمع !!! و بقيتي تقفلي تليفوناتك و تكنسلي علينا كلنا و بعدين أي فيلم بيبقى ليه خطه مسبقه في الدعايه و انتي عارفاها كويس و وافقتي عليها و دا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب و يطلعني بغني و بقول الكلام الرومانسي دا للأستاذ ماجد الكدواني مثلاً هو دا يُعقل ؟؟!!!!! أنا زعلان منك جداً يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا إحتراماً لحجات كتير يمكن فايتاكي بس مش هتفوتني و على فكره انا واثق انك عارفه اني مستاهلش منك كدا و هكتفي بالتوضيح دا و ربنا يهدي الجميع و يكتبلك كل الخير اللهم آمين
آخر كلمة: ماتفوتوش قراءة.. الصحافة اليونانية: طرد عمرو وردة من تدريبات نادي باوك بسبب السلوك المُخِل