في حوارنا مع هاني عادل، عضو فرقة وسط البلد، كلمنا عن تفاصيل أغنية “ع الوعد” وهي تعتبر أجدد أغاني الفرقة، وازاي فرقة وسط البلد بتعتمد في الأساس على الموسيقى، وعمل أي نوع موسيقى بشكل مصري.
وقال هاني عادل: “وسط البلد من أجمد الفرق وأول الفرق اللي كان عندها الشجاعة تجدد في المزيكا في مصر، علشان احنا الوحيدين اللي بنعرف نعمل أي نوع مزيكا بشكل مصري يوصل للعالمية والناس تسمعه بشكل جديد”.
ووضح: “احنا بس مالناش في التصوير كتير بس لينا في المزيكا”.
الأغنية تعتبر عودة وسط البلد للساحة الغنائية بعد غياب طويل عن الإصدارات الجديدة، وهي أول أغنية في ألبوم وسط البلد الجديد المقرر طرح أغانيه بشكل منفرد.
فرقة وسط البلد حاليًا بتستعد وتشد رحالها للأردن، للانطلاق في جولة غنائية هتبدأها من مشاركة استثنائية في فعاليات مهرجان جرش للثقافة والفنون، والحفل هيكون يوم الأحد المقبل.