في خطوة جديدة من الحكومة المصرية للاهتمام بالصحة العامة للمواطنين، أعلنت وزيرة الصحة والسكان الدكتورة هالة زايد إنه هيتم توفير العلاج والرعاية الصحية لمرضى فيروس المناعة البشرية “الإيدز” مجانًا مدى الحياة، في إطار إجراءات الحكومة للقضاء على المرض، وكمان قالت إنه تم تحديث البروتوكولات العلاجية للمرض وفقًا لأحدث إصدار، وده في المؤتمر الصحفي اللي انعقد بمناسبة الاحتفال باليوم العالمي لمرض الإيدز تحت شعار “نحو التضامن العالمي والتغطية المستدامة للخدمات”.
اقرا أيضًا: إزاي تعرفوا إنه عندكم نقص فيتامينات وإزاي تعالجوه بطرق بسيطة؟
وقالت إنه تم افتتاح 13 مركز جديد لعلاج الإيدز علشان تبقى التغطية الصحية 100% بكل المحافظات في الوقت اللي تم افتتاح 18 وحدة لعلاج الفيروسات لمستشفيات الصحة النفسية ومن بينها الإيدز، وإن ظروف وباء “كوفيدـ19” اللي بنمر بيها بيسبب مضاعفة خطورة الإصابة بالمرض، وإنهم شغالين على رفع جودة الخدمة، وسرعة صرف العلاج، ومنع انتشار العدوى.
وأكدت هالة زايد إن مصر قدرت توفر العلاج لأكتر من 90% من المصابين بالمرض وعلاجهم، وكمان تم نقل منافذ صرف أدوية المصابين للمراكز الصحية، بدل ما كانت في مستشفيات الحميات، وده لضمان توفير الحماية من فيروس كورونا.
ويُعتبر عدد المصابين بمرض الإيدز في مصر قليل، ففي أخر احصائية في سنة 2019، كان العدد 13 ألف حالة، وعدد الرجال أكتر من النساء، ولكن ده ممكن يرجع لفحص الرجال أكتر للمرض.