نواقص الأدوية: لو ناقصك دواء هنقولك تلاقيه فين

الأزمة الاقتصادية العالمية حاليًا سببت نقص في دخول المنتجات المستوردة للسوق المصري، ومن أهم المنتجات المستوردة هي الأدوية أو المواد الفعالة لها.

وعلى عكس أي منتج تاني، نقص الدواء بيهدد حياة كتير من المرضى اللي بيحتاجوا أدويتهم بشكل دوري لعلاج أمراض مختلفة وخصوصًا الأمراض المزمنة، لكن للأسف بدأنا نلاحظ مؤخرًا نقص بعض الأدوية في الصيدليات، وعلشان كده كان لازم نلاقي طريقة تساعد المرضى يلاقوا الأدوية بتاعتهم في أسرع وقت.

في المقال ده هنناقش بعض الطرق اللي تقدر من خلالها تدور على أي دواء.

هيئة الدواء المصرية

عن: elaosboa

بتوفر هيئة الدواء المصرية خدمة البحث عن الأدوية الناقصة بسهولة من خلال الموقع ده، اللي من خلاله تقدر تدور عن الدواء. بعد إرسال الاستفسار بتتواصل الهيئة مع المواطن وبتدله على أقرب مكان ممكن يلاقي فيه الدواء الناقص.

كمان تقدر تتواصل مع الهيئة على الخط الساخن 15301، وتسأل عن الأدوية اللي ناقصة، وهيتم الرد عليك خلال المكالمة بكل الأماكن المتاح فيها الدواء علشان تقدر تحصل عليه.
وبتتعامل هيئة الدواء مع استفسارات المواطنين عن الأدوية الناقصة بسرية تامة، وبتتأكد إن مش بيتم الإعلان عن الاستفسار تحت أي ظروف.

وعلشان تقدر تحصل على إجابة وافية من الهيئة، لازم توفر كل البيانات الخاصة بالدواء الناقص زيّ: الاسم باللغة العربية والإنجليزية, والاسم العلمي، والتركيز، والشكل، والغرض العلاجي للمستحضر.

تطبيق مصري بيسهل عليك البحث عن الدواء الناقص

في سنة 2020 وخلال جائحة كورونا، كان العالم كله بيعاني من نقص الأدوية، وعلشان كده استعانت الصيدلانية المصرية هناء بفريق من خمس مبرمجين ومصممين لمساعدتها في إنشاء تطبيق الكتروني يساعد الناس إنهم يلاقوا الأدوية الناقصة.

التطبيق اللي تمت تسميته “هتلاقي دواك” بيساعد على عمل حلقة وصل بين كل الأطراف اللي بتتعامل مع الأدوية والمستلزمات الطبية في مصر.

وبيوفر التطبيق 3 مداخل لتوفير مساحة تواصل بين الصيادلة والمرضى ومخازن الأدوية، المدخل الأول لتسجيل نواقص الأدوية بالنسبة للمريض أو أي استشارة طبية محتاجها، وبعد كده بيتم طرح الاستفسار على الصيادلة ومخازن الأدوية لتعمل على توفير الدواء أو الاستشارة للمريض.

الدخل التاني للصيادلة للبحث عن أي دواء ناقص في صيدلياتهم، في مختلف مخازن الأدوية الموجودة في الجمهورية. أما المدخل التالت لأصحاب مخازن الأدوية واللي يقدروا يرفعوا عليه كل محتويات المخازن من أدوية علشان يساعدوا المرضى والصيادلة.

غير تطبيق “هتلاقي دواك”، في تطبيق “شفاء“، وكمان تطبيق “دواء ناقص“، وتطبيق “بالشفا“، وتطبيق “الروشتة“، وتطبيق “علاجي“، وتطبيق “يداوي“.

وسائل التواصل الإجتماعي: تجمع للمساعدة

عن: al-ain

وسائل التواصل الاجتماعي مابقتش مجرد منصات للدردشة والتواصل، ولكنها أصبحت جزء أساسي من كل حاجة في حياتنا، ونقدر من خلالها ندور على أي حاجة ونلاقيها.

والأدوية واحدة من الحاجات اللي بقينا نقدر نلاقيها على منصات التواصل الاجتماعي بعد ما بقى عندنا جروبات وتجمعات كتير هدفها الأول هو الجمع بين المرضى والصيادلة وموفرين الخدمات الصحية.

من خلال تجمعات التواصل الاجتماعي المختلفة نقدر نسأل من خلال بوست عن أي دواء ناقصنا، وبيساعدنا أعضاء الجروب في البحث عن الدواء ده من خلال إما توفيره بشكل مباشر من عندهم أو توصيلنا بشخص تاني يقدر يوفره لنا.

علشان تلاقي التجمعات دي على منصة الفيسبوك تقدر تعمل بحث بكلمة “نواقص الأدوية” وهتظهر لك عشرات من التجمعات اللي كل شغلها الشاغل هو توفير الناقص من الأدوية للمرضى.

لو تعرف أي طريقة تانية نقدر من خلالها ندور على الأدوية اللي ناقصة، ماتبخلش بالمعلومة، وساعد مريض محتاج الدواء بتعليق.

آخر كلمة: ماتفوتوش قراءة: منظمة الصحة العالمية تعلن انتهاء كوفيد كحالة طوارئ عالمية

تعليقات
Loading...