أصوات بنحبها ومنعرفش أصحابها.. تعالوا نتعرف عالنجوم المصريين في أفلام ديزني

أفلام ديزني المدبلجة ماكنتش بس مجرد كارتون بنتفرج عليه، دي كانت بوابتنا لعوالم تانية وشاركتنا في طفولتنا بحكايات كتير مختلفة وجميلة، اتعلقنا بيها ولسة في ذاكرتنا لحد دلوقتي، وبأصوات مصرية في الدوبلاج، لكن أغلب الوقت مش بنبقي عارفين إنهم نجوم بنحبهم وعارفينهم، وبنتفاجئ لما نعرف مين اللي قاموا بتقديم الأصوات للشخصيات دي، النهارده هنعرفكم على مسيرة فنانين مصريين في ديزني بالعربي.

سلوى محمد علي

• 

• 

تعتبر من أكتر الفنانين المتألقين بأعمال كتير في الدوبلاج لأفلام ديزني، كتير منهم أفلام حققت أكبر شهرة في مصر والوطن العربي زيّ “Lion King” أو “الأسد الملك” اللي قدمت فيه دور شينزي، و”حكاية لعبة” أو “Toy Story” اللي قدمت فيه دور والدة البطل أندي، “Hercules” أو “هرقل” اللي قدمت فيه دور العرافة كلوثو، “Winnie the Poo” أو “ويني الدبدوب” اللي قدمت فيه دور كانجا،، سندريلا اللي قدمت فيه دور نفيسة، “Brave” أو “أسطورة ميردا” وقامت فيه بدور الملكة اينور.

مريم الخشت

• 

• 

رغم صغر سنها، دخلت مريم عالم الدوبلاج بأدوار اتفاجئنا إنها هي اللي قدمتها، زي سام في “الجاسوسات” اللي تعتبر من أكتر الشخصيات المحبوبة في الجيل بتاعنا، ودور ويندي في “بيتر بان”، اللي كان أول دور لمريم في عالم ديزني، ودور كوليت في فيلم “الفار الطباخ”، ودور جودي في فيلم “زوتوبيا”.

عبدالرحمن أبو زهرة

• 

برغم مشاركته القليلة في دبلجة أفلام ديزني، وأدائه لشخصيتين بس، لكنهم كانوا علامات فارقة في أفلام مهمة ومشهورة، أبو زهرة قام بدبلجة شخصية سكار في فيلم “الأسد الملك”، واللي كان دوره فيه بارز ومهم وأدائه الصوتي أضاف للشخصية كتير، وبقي محفور في أذهان كل اللي شافوا الفيلم بنسخته المدبلجة بالعربية، كمان قام بدبلجة دور جعفر في فيلم “علاء الدين”، واللي يعتبر من أكتر الأفلام المشهورة والمحبوبة من الكل مش بس الأطفال.

محمد هنيدي

• 

من أكتر الممثلين اللي صوتهم متعلق في ذاكرة الأطفال، من خلال أفلام كارتونية وشخصيات مش بس في ديزني، وقدم في أفلام ديزني المدبلجة بالعربية شخصيتين مهمين في فيلمين من أشهر أفلام ديزني، وهما: دور تيمون في فيلم “الأسد الملك”، وكالشخصية حققت نجاح كبير جدًا في نسختها العربية بسبب الأداء الصوتي المميز لهنيدي، ولحد دلوقتي من أكتر الشخصيات الكارتونية المحبوبة لكل الأعمار، بالإضافة لدور مارد وشوشني في فيلم “شركة المرعبين المحدودة”، واللي كان علامة مميزة في تاريخ هنيدي في أفلام الكارتون.

سامي مغاوري

• 

يعتبر من الفنانين اللي قدموا شخصيات قليلة لكنهم مميزين جدًا، زي دور شلبي سلوفان في فيلم شركة المرعبين المحدودة، واللي كان ثنائي مميز لدوره ودور هنيدي، شلبي سلوفان ومارد وشوشني اللي لسه بنقول إفيهاتهم والجمل المشهورة ليهم من الفيلم لحد دلوقتي، بالإضافة لقيامه بدبلجة دور داوزان في فيلم مغامرات المخبر الشجاع، وده فيلم قديم شوية لكنه متعلق في ذاكرة كل اللي شافوه.

علي حسنين

• 

بصوته المميز وطريقته في الأداء الصوتي، قدم دوبلاج لشخصيات مميزة زي شخصية جون راتكليف في فيلم “بوكوهانتس”، ودور أرشيديون في فيلم “أحدب نوتردام”، ودور زيوس في فيلم “هرقل” اللي يعتبر أشهرهم، وقدمهم بطريقة مختلفة لإن موهبته الصوتية والتمثيلية فريدة وتقدر تميز صوته وتحس إن الصوت لايق على الشخصية في الدوبلاج بطريقة يمكن تكون أكتر من الأصلية في ديزني.

آخر كلمة: شاركونا بأكتر شخصيات بتحبوها منهم.