دويتوهات شوفناها في حفل افتتاح مهرجان القاهرة السينمائي

والسنة بتقرب تنتهي، بنلاقي فاعليات كتير بتحصل على الساحة، وواحد من أهم الفاعليات اللي بتستناها الناس هي المهرجانات السينمائية، سواء للناس المهتمة بالفن والأفلام المهمة اللي بتتعرض أو اللي بيتفرج علشان يشوف الريد كاربت ومين لابس إيه، وامبارح شوفنا حفل افتتاح مهرجان القاهرة السينمائي في دورته الـ43، وبيعتبر واحد من أقدم وأعرق المهرجانات اللي بتتعمل في مصر، من وقت ما قالوا “يامهرجان”، ومن البديهي إنك تلاقيه محط أنظار الصحافة والإعلام والناس كلها تتكلم عنه، من ليلة الافتتاح لحد حفل الختام وتوزيع الجوائز.

وبما إن المهرجانات مش بس لعرض الأفلام، ولإنه سينمائي في الأول والأخر، هتلاقي تكريمات لفنانين عملوا مشوار يستحق فعلًا التكريم، هتسمع أغاني في حب الفن والسينما، ومانقدرش ننسى روح الكوميديا وردود الفعل التلقائية اللي بتبقى موجودة في أي مهرجان، ودي من ضمن الحاجات اللي لفتت نظرنا في حفل الافتتاج واللي حبينا نتكلم عنها.

دويتو خالد الصاوي وعلي ربيع

دويتو علي ربيع وخالد الصاوي قدروا إنهم يطلعوه طبيعي جدًا وتلقائي، بالرغم إن الناس لما شافتهم على المسرح مع بعض، كل واحد له سكته في التمثيل إيه المشترك اللي بينهم اللي يجمعهم على مسرح واحد ويقدموا فقرة مع بعض؟ بس في الحقيقة الفقرة كانت تلقائية وطبيعية ودمها خفيف.

نيللي وسمير صبري

شئ مهم جدًا للشخص اللي بيتكرم إنه مين هو اللي هيقدملوا الجائزة، ولازم يكون حد مهم بالنسبة له ولهم مشوار فني مع بعض وبتربطهم علاقة صداقة وحب وتقدير، وده اللي بيخللي التكريم له معنى أكتر بالنسبة للي بيتكرم، وفي تكريم الفنانة نيللي، كان سمير صبري صديق عمرها واللي عملت معاه أكتر من 13 فيلم هو اللي كان بيقدم لها الجائزة “جائزة الهرم الذهبي لإنجاز العمر” والحوار اللي دار بينهم على المسرح رجعنا بالزمن تاني لأول فيلم عملوا مع بعض، بخفة ولطافة وحب خطفوا قلوبنا من دويتو الزمن الجميل.

كريم عبد العزيز ومنى زكي

على المستوى الفني أجمل أعمالهم وأول مشوارهم السينمائي كانت مع بعض، ولاد العلم وأضحك الصورة تطلع حلوة وليه خلتني أحبك وأبوعلي، فكان من الطبيعي إنها تبقى أنسب واحدة تقدمله الجائزة، وده اللي قاله كريم ساعة التكريم ” أنا ماكنش ينفع حد يقدمني غير منى زكي”

هاني شنودة وهند عبد الحليم

عزف الموسيقار هاني شنودة وغنت هند عبد الحليم “الفن أمل وحياة”، بكلماتها اللي بتشكر فيها كل صناع السينما من أول المخرج لحد عامل البوفية، وبخفة دم ورقي هاني شنودة اتعمد إنه يلفت نظر الناس له بإنه يعزف في الأول المقطوعة الغلط، واللي الناس ماتعرفوش إن هند عبد الحليم بدأت حياتها الفنية وهي بتغني في فرقة المصريين لهاني شنودة.

أخر كلمة: ماتفوتوش قراءة: أكتر اللحظات اللطيفة اللي شوفناها على السجادة الحمراء في مهرجان القاهرة الـ 42