من 2020: ليه الزمن عدى بس كل حاجة وقفت عند الوقت ده؟

زي دلوقتي من ٣ سنين، الزمن وقف بينا، الزمن وقف في العالم كله، العالم كله اتقفل وكل حاجة وقفت، تخيل لما بتقعد مع نفسك كده وتقول ياه نفسي آخد بريك كده افصل دماغي فيه خالص، وماعملش أي حاجة، تخيل بقى الكوكب كله أخد البريك ده، كله لازم يقعد في بيته وينعزل، الشوارع فاضية، المطارات والموانئ وحركة الطيران والملاحة واقفة، الأرض فاضية والسما فاضية.. كل واحد متقوقع في مكان وخايف يتحرك.

الفكرة، إننا دلوقتي مش بس بنستعيد ذكريات الجائحة دي. بس لاحظنا -مش احنا لوحدنا الحقيقة- إن الدنيا بعدها مشيت عادي، بس في نفس الوقت مامشيتش عادي.. فزورة؟

لأ.. سيطرنا على الفيروس، كل حاجة تقريبًا رجعت زي ما كانت، بس كان نفسنا نكمل الجملة ونقول “كل حاجة رجعت وكأن شيئًا لم يكن” بس الصراحة لا، احنا كأننا اتحشرنا في 2020 ومش عارفين نطلع، لدرجة إن في تعاملاتنا اليومية ممكن تطلع كلمة من حد بتلقائية ويحسب إننا لسه في 2020، الفجوة الزمنية دي راحت فين؟ وليه لسه عقلنا متشبث بالفترة دي؟

باب اللعنات.. الأزمة العالمية الكبرى

عن: cnn

مش هننكر إن جيلنا جيل منحوس وعدى بكوارث وأوبئة كتير، من إنفلونزا الطيور لانفلونزا الخنازير، لثورات، وكل المصايب اللي قلبك يحبها، بس كورونا كانت الضربة القاضية، ليفل الوحش اللي حسسنا إن كل اللي فات حاجة واللي بنواجهه ده حاجة تانية.

جائحة كورونا هي الأزمة الكبرى اللي واجهها العالم، من بعدها إحساسنا بالكوارث بقى أكبر، زي ما يكون جهاز الخطر جوانا اشتغل بشكل مختلف، تحس إن من وقتها كأن باب اللعتات اتفتح، جت بعدها حروب وأزمات اقتصادية لسه بنحاول نتعافى منها لحد النهارده.

قابلنا نفسنا

في فيلم الاختيار، كان النص التالي:

‏-عارفين الواحد بيقابل مين فى آخر الرحلة .. رحلة حول العالم .. فى الفضاء؟

-قول لنا يا محمود .. الشيطان؟

-لا .. أقبح من الشيطان .. الواحد بيقابل نفسه!

دي أول حاجة جت في بالنا واحنا بنكتب الجزء ده من المقال، عندنا إحساس إن قعدتنا في العزل أثرت في الموضوع بشكل مباشر، العزلة لشهور ويمكن سنة أو حتى أكتر، أثرت نفسيًا علينا وعلى تفكيرنا وغيرته. تفتكروا ازاي؟

سألنا الأخصائي النفسي د/ أحمد توفيق، وجاوبنا على النقطة دي وقال:

“كل واحد عاش الفترة دي بطريقة، بس عمومًا الأوقات اللي بيبقى فيها حروب أو أزمات كبيرة الإنسان بيحس بإحساس من الهدوء، بيكون من باب “احنا في الهوا سوا” بمعنى إني مش في الأزمة لوحدي لا الأزمة علينا كلنا، وده بيخلّي قدرة الإنسان على المقاومة وإنه ينجو من اللي بيحصل أكبر، أينعم في مخاوف على المستوى الاقتصادي والسياسي وحتى الأسري، لكن أزمة زي الكورونا بتخلّي الناس تبدأ تراجع بعض التفاصيل، زي إنهم يبطلوا يفكروا في المستقبل لا بالسلب ولا بالإيجاب، ودي حاجة مهمة الإنسان يعملها علشان يبطل يجري في دايرة مقفولة. كورونا خلتنا نقف وناخد نفس”.

صدمة نضج

غير الانعزال، شخصيتنا قبل 2020 حاجة وشخصيتنا بعدها حاجة، زي ما يكون حد أخدنا ورمانا من مرحلة للتانية، معظمنا ويمكن كلنا نضجنا بشكل غريب بعد الأزمة دي، كلنا حسينا بمسؤولية، كلنا كنا في موقف شايفين وحاسين إننا ممكن في لحظة نخسر كل حاجة.. نهاية العالم المصغرة اللي شوفناها دي أكيد اتغيرنا بعدها.

د/ توفيق قال في النقطة دي: “بعد كل أزمة كل واحد بيطلع تفسيرات معينة بتكون نتيجة للخبرة والتجربة بتاعته، تفسير الصدمة بيختلف من شخص للتاني، مثلًا ناس فسرت الأزمة على إنها مؤامرة عالمية من الدول العظمى، في ناس قالت ده غضب من ربنا، ناس قالت ده اختبار من ربنا، كل واحد بنى تصوره وتحليله بناء على تجربته اللي كمان تربيته وخبرته وتعليمه وعوامل كتير بتلعب دور أساسي فيها.

ليه لسه الزمن واقف بنا في 2020؟

بعد كل الأفكار دي كنا مستنيين إجابة علمية، شاركنا بها د/ توفيق وقال: “ليه حاسين كده؟ أزمة كورونا غيرت فينا كلنا، اقتصاديًا في دول وقعت، في ناس خسرت شغلها، في ناس قفلت شركاتها، على المستوى الإنساني ناس خسرت أشخاص عزيزة عليهم، في ناس الكورونا أثرت عليهم صحيًا بشكل كبير لسه بيتعافوا منه لحد النهارده زي اللي فقد حاسة الشم ومارجعتش بشكل كامل، طبيعي إن بعد وقت الناس مرت فيه بتجربة لها أثر ثابت ومكمل معاها للنهارده، طبيعي إنهم يحسوا إنهم لسه ماتخطوش المرحلة، لكن ده بيتحل بالوقت، زي ما بنقول إن الوقت بيعالج حاجات كتير، لكن أزمة بالحجم ده طبيعي تاخد وقت كبير لحد ما نتعافى منها، وممكن عمرنا ما ننساها، لكن الوقت هيخلينا نتخطى آثارها”.

التجربة كانت صعبة، بس ممكن نبص لجانب مشرق ونبص على نص الكوباية المليان -حتى لو فيها بوق واحد حتى- ونحتفل بإننا نجينا من كل ده، وخرجنا منه بأقل خساير ممكنة. علشان نقدر نتخطى التجربة ونركز على اللي جاي ونتخلص من توابع الأزمة اللي لسة مأثرة علينا، وأهو على الأقل بنشارك بعض الأفكار، وإننا “في الهوا سوا”.

آخر كلمة: ماتفوتوش قراءة: الخروج إلى النهار: عن جيل من الشباب بيحاول يخرج من الاكتئاب والعزلة

تعليقات
Loading...