من أول ما ظهر على بوستر المسلسل كبطل رئيسي، والناس حسّت إنه مش مجرد دور عادي، وإنه ممكن يكون هو الحدوتة الحقيقية لرمضان السنة دي.. وده فعلًا اللي حصل!
علي البيلي، أو “يوسف” في لام شمسية، خطف القلوب من غير ما يتكلم، وحبس الأنفاس في مشاهد محددة، لدرجة إن الناس كانت بتبص لبعض وتسأل: “هو ده طفل بجد؟!”
موهبة نضجت في هدوء، وأبدعت في صمت، وأثبتت إن الأداء القوي مش دايمًا محتاج صوت عالي، أوقات النظرات وحدها بتحكي حكايات!
لاتفوّت قراءة: أجمل “دويتوهات الحب” في دراما رمضان 2025.. ثنائيات خطفت قلوبنا
“لام شمسية ولام قمرية”.. نشيد يوسف اللي حكى حكايته!
“لام شمسية ولام قمرية، واحدة نقولها والتانية خفية”، نشيد حفظته مامته ليه وردده في طابور المدرسة.
بس ماكانتش مجرد كلمات، دي وصفت حال يوسف “علي البيلي” في المسلسل بحرفية شديدة.
خصوصًا في جملة “الشمسية متخبية زي السر وزي الذنب”، زي حياته السرية مع صديق والده وسام.
علاقة غامضة محدش فاهمها، بس يوسف دايمًا بيختار الصمت.. وبعد الصمت؟ بيجي الإبداع!
لا تفوّت قراءة: أكثر المسلسلات مشاهدة في رمضان 2025.. من احتل الصدارة؟
عندما تقول كل شيء بدون أن تنطق بحرف!
قبل ظهور علي البيلي، الناس كانت بتسأل: “فين المواهب الحقيقية بعيد عن دور الطفل الرخم أو الكوميدي؟”
والإجابة كانت عنده! موهبته ظهرت حتى في نظراته، من غير ما يقول جملتين على بعض.
نظراته قالت كل حاجة: غبطة، توتر، تعاطف، فضول، ملل، إحساس بالضياع والحيرة.
استخدم أدوات المحترفين، حاجات مش أي طفل يقدر يعملها، خصوصًا في قضية صعبة زي تحرش الأطفال.
وده بان حتى في بوستر المسلسل، لما كان محبوس في قفص وسط أشلاء أطفال، وكأنها رسالة واضحة عن انتهاك براءته!
لا تفوّت قراءة: كيف نجح مصطفى غريب في التسلل إلى قلوب الجماهير؟ السر في خلطة الكوميديا
“أكتب بكوني أمًا راجيةً الناس ألا يُحمِلوا الطفل، بطل المسلسل، فوق طاقته عبر منشورات تتضمن أسئلة مُربكة أو مؤذية أو تعليقات تصم الشخصية أو تحليلات غير علمية، الطفل يتمتع بشجاعة كبيرة أكثر من غيره”
الكاتبة مريم نعوم
خطوات علي البيلي الفنية.. مشوار نجم صغير بيكبر بسرعة!
بدأ علي البيلي مشواره الفني وهو لسه طفل، وشارك في أعمال تلفزيونية ناجحة.
وفي الكبير أوي 7 (رمضان 2023)، قدم دور “الكبير” في طفولته وأتقن اللهجة الصعيدي ببراعة.
وظهر في ليه لأ 2 (2022) واللعبة، وأبهر الجمهور بدور الطفل الذكي اللي بيلف ويدور على اللي حواليه.
وموهبته مش بس في التمثيل! شارك في إعلان “تجمّل بالأخلاق” ضمن حملة أخلاقنا الجميلة، وكمان في إعلان “مستشفى أهل مصر” لعلاج الحروق.
بخطوات ثابتة وموهبة استثنائية.. علي البيلي نجم بيتشكل قدام أعيننا!
“لام شمسية”.. الدور الأخطر والأهم في مشوار علي البيلي!
رغم كل أعماله، يفضل دوره في لام شمسية هو النقلة الحقيقية، الدور اللي يخليك تنسي إنه طفل بيمثل!
أداءه يخليك تصدق كل لحظة، لدرجة إنك ممكن تنسى إنه لسه في أول خطوات مشواره الفني.
مش مجرد طفل في مسلسل.. دي موهبة حقيقية بتفرض نفسها!