بعيدًا عن الأحكام المسبقة ووضع الناس في قوالب، بس احنا في المقال ده جايين نعرفك على أنواع شخصيات هتقابلها في الشغل أيًا كان مجالك، تعددت المجالات لكن الشخصيات متكررة، زي عصفورة المدير كده، أو اللي كلامه أكتر من شغله، أو اللي جاي رحلة، أو اللي جاي يزق اليوم ومش فارق معاه غير إن ساعات العمل تعدي وياخد شنطته ويجري.
المتملق
عنده استعداد يستحمل أي حاجة في سبيل إنه يوصل للي هو عايزه ويتقرب للمديرين وبتقرب من كل من له مصلحة معاه، مافيش شغلانة تخلو من الشخصية دي، وأوقات بيكون موظف 2 في واحد؛ متملق وعصفورة بتوصل الكلام أيًا كان الهدف، سواء طمعًا في ترقية، أو زيادة في المرتب، أو لمجرد احساس إنه بيوقع الناس في بعض ويشوف الدنيا بتولع كده فيحس هو بالانتصار.
زق معايا اليوم
ده بقى سواء كنا في أول اليوم، راجعين من أجازة، مبسوطين، زعلانين، مزنوقين في الشغل أو حتى مافيش ضغط، ده بيكون رافع شعار زق معايا اليوم وخلينا نخلص الشغل ونمشي بغض النظر عن أي حاجةة هو عايز يمشي دنيته علشان مجرد ما الساعة 6 تيجي ياخد الشنطة وينزل.
الأم
ما يعرف بالمامي أتتيود المنتشر من سنين قليلة بقى موجود في كافة الأصعدة لحد ما وصلت للشغل، في ناس بيكون عندها غريزة الأمومة وحاسة بالمسؤولية تجاه اللي حواليها، بتطمن على زمايلها لو حد محتاج مساعدة في شغل، واخدين بالهم من صحتهم وفطروا ولا لسه حد محتاج دعم ومساندة نقدمها، وبتكون هدفها نشر الحب والسلام في أرجاء العمل.
مستر دليفري
دليلك الوافي أول ما تحس بالجوع، بنروح نسأله وبيوافينا بمنيو المطاعم القريبة حسب الوجبة ونفسا ناكل إيه والميزانية قد إيه، كل المطاعم مسجلة رقمه وعارفينه، وده واحد من أهم أعمدة أي شركة لازم تحافظوا عليه.
عم ضياء
مبدئيًا الشخصية دي يننصحك تبعد عنها قدر الإمكان للمحافظة على صحتك النفسية، لإنه بيشع طاقة سلبية وشايف كل حاجة سوداء، حتى الحاجات العادية هو شايفها بنظرة كئيبة، ده حاولوا تجمعوا له فلوس وتطلعوه رحلة يمكن يفك.
الفرفوش
الشخصية اللي الكل بيحب يقعد معاه علشان هو في أي قعدة هيقلبها ضحك وهزار وطاقة إيجابية، بيمشي يوزع طاقة لذيذة في المكان كله وحتى الكآبة وضغط الشغل بياخدهم بروح دعابة وبيعدي الدنيا من غير طاقة سلبية، ده بننصحك تقرب منه في بيئة العمل.