بنحتفل النهارده 1 مايو بعيد ميلاد إعلامي لبناني كبير، هو جورج قرداحي اللي اتشهر بعد برنامج (من سيربح المليون) بسبب إفيهاته وحضوره المميز.
اتولد قرداحي يوم 1 مايو سنة 1950، في قرية فيترون في محافظة جبل لبنان، ودرس الحقوق والعلوم السياسية، وشهادات في الإعلام من معهد اللوفر في فرنسا.
بيتكلم قرداحي اللغة الإنجليزية والإيطالية والفرنسية، بالإضافة إلى اللغة العربية، وبدأ مشواره الإعلامي وهو طالب في الجامعة من خلال جريدة (لسان الحال) اللبنانية سنة 1970.
وفي سنة 1973، انتقل لتلفزيون لبنان كمقدم للأخبار والبرامج السياسية، وبعدها انضم لإذاعة (مونت كارلو) واشتغل معد ومقدم البرامج السياسية ونشرات الأخبار.
بدأ قرداحي شغله مع قنوات (إم بي سي – MBC) سنة 2000، وهناك قدم برنامج المسابقات العربي المشهور (من سيربح المليون) واللي اتحول لواحد من أهم البرامج العربية.
ارتبط البرنامج في نسختة الأولى والتانية (من سيربح الاتنين مليون) بشخصية قرداحي المميزة في التقديم والأسئلة، والتشوق والإثارة.
قدم كمان برامج مهمة زيّ (افتح قلبك) على قناة (إل بي سي – LBC)، وبرنامج (التحدي) و(القوة العاشرة) على (إم بي سي – MBC) قبل ما يسيبها نهائيًا سنة 2011.