من اللبس للبرفانات والميك آب: فنانين عرب دخلوا عالم الموضة بإطلاق منتجاتهم الخاصة

في بعض الفنانين في الوسط الفني، بيكون عندهم اهتمامات في حاجات مختلفة غير الفن، وأبرز الاهتمامات اللي كتير من الفنانين بيحبوا يتطرقوا لها ويدخلوا العالم بتاعها، هو عالم الموضة. ده موجود ومنتشر أكتر في الدول الغربية، فبنلاقي معظم الفنانين سواء ممثلين أو مغنيين بيطلقوا خطوط أزياء، برفانات أو ميك آب. ولكن كمان دلوقتي بقينا نشوف بعض الفنانين العرب اللي أخدوا الطريق ده وبدأوا يطلقوا خطوط أزياء خاصة بيهم، ودول أبرزهم.

أحلام

عن: Arab News

الفنانة أحلام أطلقت برفان خاص بيها باسم “روجا” بحجم 30 مل لغرض إنه يقدر يتشال في الشنط الصغيرة. وأطلقت عطر تاني باسم “وهج” واللي كان عطر ظهر للنور نتيجة التعاون المشترك مع الأميرة سلطانة آل سعود، وهو عطر من مجموعة الأميرة سلطانة واللي بتضم عطر تسنيم. البرفان عبارة عن مزيج من الأخشاب الاستوائية، واللبان العماني الأصيل، ومزيج من الجلود النادرة والمتنوعة.

عمرو دياب

الهضبة كان من الفنانين اللي دخلوا عالم الموضة مؤخرًا عن طريق إطلاقه برفان باسم 34 وبعدها بكام شهر أعلن عن إطلاق خط أزياء كامل اللي مش بس بيشمل الملابس، لكن كمان هيتضمن النظارات الشمسية والطبية، وخط إنتاج كبير للإكسسوارات والمنتجات الجلدية. اسم 34 بيرمز لسنة ميلاد والد ووالدة عمرو دياب.

إليسا

عن: Arab News

إليسا كمان كانت مهتمة بقسم العطور، فأطلقت برفان باسم Elle D’Elissa. وأطلقت مستحضرات تجميل خاصة بيها باسم The Star سنة 2019 بالتعاون مع بسام فتوح.

بسمة بوسيل

بسمة بوسيل من الفنانات اللي اعتزلوا الغناء، لكنها تطرقت لعالم الموضة باحترافية شديدة حققتلها كتير من النجاح. فالفنانة المغربية أطلقت بوتيك خاص بيها، ومقره الأساسي في المغرب، اللي بتعرض فيه منتجات تجميل وكمان عندها صفحة على الإنستجرام بتعرض فيها أزياء، بالإضافة لإمكانية طلب منتجاتها من موقعها على الإنترنت لإن في إمكانية الشحن لأي دولة في العالم والشرق الأوسط.

تامر حسني

مؤخرًا، شارك الفنان تامر حسني جمهوره فيديو من كواليس مؤتمر اللجنة الأولمبية، وأعلن عن إطلاقه أول خط أزياء إيطالي له، وعبر عن سعادته لاختياره الراعي الرئيسي للزي الرسمي للمنتخب المصري بالبعثة الأولمبية المصرية بطوكيو 2021.

نجوى كرم

سنة 2019، أطلقت نجوى كرم عطر خاص بيها، وأقامت احتفال في لبنان بحضور نجوم الإعلام والصحافة تحت رعاية الشركة المنتجة للعطر “ميلانو”.

بلقيس فتحي

اختارت الفنانة الإماراتية بلقيس فتحي، موسم خريف وشتاء 2020-2021 علشان تقرر إطلاق علامة جمالية خاصة بها تحمل اسم بيكس بيوتي Bex Beauty، علشان تكون براند للميك آب خاصة بيها.

راغب علامة

سنة 2012، باريس غاليري أطلقت عطر بيحمل اسم الفنان راغب علامة، واللي أشرف على تركيبة البرفان وقتها راغب علامة بنفسه لإنه من الفنانين المهتمين بمجال العطور.

ميريام فارس

ميريام فارس أطلقت أغنية باسم “أنا والشوق” سنة 2013 واللي حققت نجاح كبير وقتها، وعلشان كدة تزامنًا مع نجاح الأغنية أطلقت عطر خاص بيها بيحمل نفس الاسم.

ماجد المهندس

ماجد المهندس أطلق عطر نسائي بيحمل اسم لقبه الفني المعروف بيه “البرنس” واللي تم إنتاجه بالتعاون مع إحدى شركات العطور.

آخر كلمة: عرفنا إيه هو خط الأزياء المفضل بالنسبة لك في الكومنتات!

تعليقات
Loading...