أغاني الأفلام ساعات بتكون من أهم العناصر اللي بتنجح الفيلم. لإن الأغاني الحلوة بتقدر تضيف لموود الفيلم وتخليه memorable عند الجمهور. وأفلام سينما المصرية شهدت أعداد كبيرة من النوع ده من الأغاني المميزة. اللي مهما بيعدي عليها الوقت، بتقدر تسعدنا وتمتعنا زيّ أول مرة سمعناهم فيها. من الأغاني الرومانسية، للأغاني الحزينة أو حتى الكوميدية، مكتبة الموسيقى المصرية كانت مليانة! علشان كده، حبينا نسترجع بعض أغاني الأفلام المميزة اللي سمعناها على مر السنين.
كاجولوه – محمد هنيدى – صعيدى فى الجامعة الأمريكية
قولنا نبدأ بحاجة نوستالجيا وفرفوشة كده.. مين يقدر ينسى الفيلم ده؟ أو يقدر ينسى أي أغنية من الأغاني اللي بيغنيها هنيدي بنفسه في بعض أفلامه؟ صحيح هو مش مطرب، ولكن ماحدش يقدر ينكر إن أغانيه رائعة!
أنا حبيت – خالد سليم – السلم والثعبان
السلم والثعبان من الأفلام اللي عليها إجماع. فيلم وأغنية الفيلم أنا حبيت لخالد سليم.. فعلًا في حتة تانية!
نسيني وأنا جنبك – أحمد برادة – حب البنات
حازم صوته حلو أوي يا آنسة غادة. أغنية دخلت التاريخ من أوسع أبوابه من خلال الميمز. فيلم حب البنات لوحده من أكتر الأفلام المصرية المحبوبة، واللي نجاحها مستمر بمرور السنين، وكمان بإفيه حازم، كده الفيلم ضمن إنه يفضل محفور في ذاكرة الناس!
لكل عاشق وطن – خالد سليم – أبو علي
ماينفعش نتكلم عن قائمة أجمل أغاني الأفلام، من غير ما نتكلم عن أغنية لكل عاشق وطن من فيلم أبو علي. أغنية نجاحها لا يقل نجاحًا أبدًا عن نجاح الفيلم نفسه.. لإنها من هوية الفيلم. ماينفعش تذكر حاجة منهم من غير التانية.. وهو ده النجاح الحقيقي!
كده رضا – هشام عباس – كده رضا
الأغنية ماكانتش جوا الفيلم، ولكنها اتعملت مخصوص للفيلم.
كتير بنعشق – شيرين عبدالوهاب – عن العشق والهوى
أغنية بتُعتبر أيقونة، ومستحيل تتنسي مهما يفوت عليها الوقت. أغنية مهما كان سنك – هتحس إنك عايز تعيط وإن عندك مأساة عاطفية أنت مش عارف تفتكر هي إيه! من أحلى الأغاني اللي فعلًا اتعملت لفيلم عربي. أغنية معبرة وواقعية.. أغنية متكاملة من كل النواحي.
حلم عمري – خالد سليم – سنة أولى نصب
معلش استحملوا الـ emotional roller coaster اللي هنخدكم فيها في المقالة دي. بس الأغنية دي لما شوفناها في الفيلم، انتشرت بسرعة كبيرة وبقينا نسمعها في كل حتة. ولحد دلوقتي لو حد سمع مقطع واحد من الأغنية، هتلاقيه حافظها وبيسمعها كمان- هي وأغنية بلاش الملامة من نفس الفيلم!
هي الحياة كده ليه – فيلم أنت عمري
من الأفلام اللي ماتتنسيش.. من غير أي شك! من القصة للإخراج للتمثيل لكل الأغاني الموجودة. فيلم فعلًا أسطورة! وأغنية هي الحياة كده ليه، ليها كده مكانة خاصة عند الجمهور.
نخبي ليه – وائل جسار – 365 يوم سعادة
الفيلم اللي مستحيل نفتكره، من غير ما نفتكر أغنيته!
زيّ ما هي حبها – مدحت صالح – مافيا
أغنية تخليك تحس بالوطنية كده.. مش كده؟ الفيلم والأغنية وصوت مدحت صالح، كانوا فعلًا المزيج المثالي!
شنكلوه – مصطفى قمر – حريم كريم
حريم كريم فيلم بأبطاله بأغانيه كلهم بشخصيات وإيفيهات الفيلم.. package كده ماتتنسيش، ومانفتكرش هتقدر تتكرر تاني!
واحد من الناس – لؤي – واحد من الناس
أغنية فيلم واحد من الناس اللي بتحمل نفس الاسم، قدرت تعبر عن حال كتير من الناس اللي ظروفها صعبة وبتحاول تعيش جانب الحيطة، ولكن أزمات الحياة بتصعب عليهم ده,
حبيت دلوقت – كارول سماحة – أحلام عمرنا
أغنية حبيت دلوقت تعتبر من الكلاسيكيات الجديدة، اللي الكل لسه بيحب يسمعها، خصوصًا “لايف” في حفلات كارول سماحة.
أنا مش بعيد – مدحت صالح – حرب أطاليا
أيوة ميكس أحمد السقا ومدحت صالح تاني في نفس المقالة. أغنية أنا مش بعيد اتعملت لفيلم حرب أطاليا. ومع إنها ماتعرضتش جوا الفيلم نفسه، إلا إنها حققت نجاح كتير لاقترانها بالفيلم بشكل عام.
كل مرة – تامر حسني – سيد العاطفي
أغنية من أغاني تامر حسني اللي ماحدش بينساها من فيلم سيد العاطفي. ميكس كده بين الكوميدي والرومانسي وحاجات تانية مش فاهمينها.. بس الأغنية حلوة!
بحبك وحشتيني – حسين الجاسمي – الرهينة
وبمناسبة الوطنية. فالأغنية دي تليق إنها تكون لشخص، وتليق كمان إنها تكون عن حب الإنسان لبلده. اللي بيشتق لها مهما يغيب عنها، واللي بيحبها رغم أي عيوب ممكن تكون فيها.
كل واحد – آدم – كلاشنكوف
موود تاني خالص احنا عارفين. بس الأغنية دي كانت من أكتر اللي بيميز فيلم كلاشنكوف. أغنية مؤثرة وعاكسة لأحداث وشخصيات الفيلم.. ولاقت نجاح كبير وقت عرضها.