من البياعين للمتطفلين: أنواع شخصيات هتقابلها في المترو

المترو على عكس وسائل المواصلات التانية، حالة وحياة صعب تجيب أو تلاقي زيها، بيجمع كمية من البشر على اختلاف من الشخصيات برضه صعب أنهم يتجمعوا في مكان واحد إلا في الاستاد، ولكن ما بالك بقى أنهم بيتجمعوا كل يوم في عربية واحدة؟ وكل واحد فيهم بيمثل شخصية لوحدها ممكن تكتب فيها كتب.

اللي بيتدخل في حياتك

ودول في منهم كتير من فئة المتطفلين والحشريين، تبقى قاعد في أمان الله يتلاقي واحد دابب عينه في موبايلك ويشاركك قراراتك في اختيار الطقم الجديد أو يشاركك لحظات الفرجة على الفيديو وتلاقيه بيطلع لك من حيث لا تدري ويقولك “لأ مايصحش كان يعمل كده”، أو بعد ما يخلص مكالمتك الطويلة تلاقيه بيعلق ويبدي رأيه في الموضوع .. “أنا لو منك ماكونتش اتصرفت كده”.

الميكب ارتيست

ودي بتبقى في عربية الستات، بتبقى نازلة من البيت مستعجلة ومش بتلحق تكمل لبسها في البيت ولا بتلحق تحط المكياج، فالمترو بيبقى هو المرحلة اللي بيتم عندها استكمال ما لم نتمكن من الانتهاء منه قبل النزول من البيت، مكياج بقى تظبيط حجاب، مابيفرقش.

اللي بيذاكر

وده بقى من فئة الناس اللي بتحب تزنق نفسها في أخر دقيقة، بتذاكر قبل ما تنزل بتذاكر على باب اللجنة ومافيش مانع لو ذاكرت في المواصلات وبالتحديد في المترو، ودايمًا الجزئية اللي تلاقييه بيذاكرها في الطريق هي دي اللي بيلاقيها أول سؤال في الامتحان، برغم أنه مش بيبقى فاكرها برضه، ولو مالقتش حد ماسك الكتاب وبيذاكر في صمت هتلاقي النوع التاني اللي معاه صاحبه وبيسمعله.

النايم

وده اللي بيبقى مقسم عدد ساعات نومه لجزأين، جزء بينامهم في البيت والجزء التاني بينامهم في المترو، لأنه في الغالب مشواره بيبقى بعيد لدرجة أنه مش بيلاقي حاجة تسليه غير النوم ثم النوم، وسبحان الله بيبقى ظابط معاد صحيانه على معاد المحطة اللي هينزل فيها بالظبط.

البياعين

من الحاجات اللي بتميز المترو عن أي وسيلة مواصلات تانية هي بياعين المترو، فين هتلاقي 10 بياعين هاجموك مرة واحدة بدون سابق إنذار ودخلوا عليك العربية وبدأو في استعراض منتجاتهم؟ أينعم أنت مش بتبقى سامع ولا واحد فيهم من كتر ما بيتكلموا في نفس واحد، بس أهو بيسلوك لحد ما تنزل محطتك وأنت بتستمع بالشو اللي بيتعمل علشان يكسبوا به الزبون.

اللي بيبقى لازق على الباب

ودول مافيش أكتر منهم، لا بيبقوا نازلين المحطة اللي جاية ولا عارفين هما نازلين فين، بس كل اللي بيعملوا أنهم بيبقوا واقفين على الباب زي البودي جارد لا بينزلوا ولا بيخلوا الناس اللي عايزة تنزل تعرف تنزل ولا اللي نفسها تطلع تعرف تطلع، زي اللقمة في الزور كده.. ربنا يحمينها منهم والله.

آخر كلمة: ماتفوتوش قراءة: ريد كاربت الغلابة: قطع فنية ماتتفوتش من مسلسلات رمضان