اسم اللاعب المصري مصطفى محمد، لاعب نادي جالاتا سراي التركي، ومهاجم منتخب مصر، واللي بيشارك في بطولة أمم أفريقيا في الكاميرون مع المنتخب المصري، كان واحد من أهم مصادر البحث على جوجل، من امبارح التلات. وده بعد ما انتشر خبر فيه تفاصيل غريبة عن مصطفى.
النهارده الصبح، أصدرت وزارة التعليم العالي، بيان بعد انتشار خبر انتحال أحد الطلاب لشخصية مصطفى محمد علشان يدخل امتحان الاحتمالات والإحصاء مكانه، يوم الاتنين، في معهد المدينة العالي بشبرامنت، في محافظة الجيزة.
وكان كشف منتحل شخصية اللاعب لرجال الشرطة، خلال التحقيقات، إن اللي عمله ده حصل بالاتفاق مع مصطفى علشان ينقذ مستقبله الدراسي، وإن المنتحل فضل يعمل كده كخدمة لصديقه اللي بيعمل مهمة وطنية في الكاميرون.
وفي خبر منشور على المصري اليوم الرياضي، أكدت المجلة إن مصطفى قال لزمايله في منتخب مصر، ولوائل جمعة مدير المنتخب، إنه مايعرفش أي حاجة عن الواقعة دي ولا عن الشخص اللي انتحل شخصيته.
وأكد مصطفى إنه مش منطقي خالص إنه يعمل حاجة زيّ دي بالذات إنه بيمثل مصر بشكل قانوني في بطولة رسمية، وفي إجراءات معروفة بتتم بالتنسيق مع وزارة التعليم العالي في الحالات دي علشان يظبطوا تخلفه عن أداء الامتحانات في ميعادها.
وزارة التعليم العالي أكدت من جانبها إن الواقعة دي حاليًا في طور التحقيق من جانب النيابة العامة، وكمان بتتابع الوزارة التحقيقات اللي بتحصل حاليًا في المعهد بخصوص ملابسات الواقعة دي.
اللاعب البالغ من العمر 24 سنة، عدت عليه مواقف سببت له مشاكل كتير، من بداية مشواره الرياضي، كان آخرها لما تف في الملعب في وقت تولي حسام البدري تدريب المنتخب الوطني، واللي فسرها ناس كتير إنها إهانة موجهة للمدرب اللي ماخلاهوش يشارك في بدابة المبارة.
وأكد سيد معوض، مساعد حسام البدري في الجهاز الفني، لما ظهر كضيف فى برنامج “الماتش” اللي بيتذاع من خلال قناة صدى البلد، إن اللاعب قصد بالتفة والألفاظ قليلة الذوق مدربه البدري، وكمان حذره من الغرور، ونصحه ياخد محمد صلاح قدوة.