بدأ معرض القاهرة الدولي للكتاب دورته الـ 54، يوم التلات 24 يناير، وهتستمر الدورة الحالية لحد يوم الاتنين 6 من شهر فبراير الحالي، وحققت الدورة الحالية من المعرض الدولي إقبال كبير من أول يوم، وهو الإقبال اللي توافد على المعرض من مختلف المحافظات والفئات والأطياف.
قال الدكتور أحمد بهي الدين، رئيس الهيئة المصرية العامة للكتاب، إن عدد زوار المعرض وصل لحد دلوقتي لحوالي اتنين مليون ونص مليون زائر، واعتبر بهي الدين إن ده تتويج لتعاون جهود جميع القائمين على المعرض، وتعاون مجموعة كبيرة من قطاعات الوزارة المختلفة وهيئات ومؤسسات الدولة.
وأشار إن الإقبال الجماهيري على المعرض النهارده، استمر لحد قبل وقت قليل من إغلاق أبواب المعرض، وكان في تفاعل كبير مع كل الأنشطة والفعاليات اللي تمت داخل حدود المعرض، وأكد إن ده انعكس بشكل واضح على نسب مبيعات أغلب الناشرين المصريين والعرب والأجانب، اللي اتضاعفت خلال اليوم.
ووضح بهي الدين إن بعض الطبعات خلصت بالكامل في أجنحة قطاعات الوزارة، وعند الناشرين اللي عبروا عن سعادتهم بالمشاركة في عيد الثقافة المصرية، واتوقع رئيس الهيئة المصرية العامة للكتاب إن المعرض هيحقق معدلات غير المسبوقة خلال الأيام القادمة.