شهد طريق القاهرة السويس امبارح السبت واقعة غريبة وثقها المارة عن طريق فيديوهات تم تداولها على مواقع التواصل الاجتماعي، وهي اللقطات اللي أظهرت تهور سواق عربية ملاكي كان هيتسبب في كارثة حقيقية.
مطاردة مع واحد سكران على الطريقة الأمريكية
طريق القاهرة السويس كان شاهد على شاب كان سايق عربيته بطريقة متهورة ومخالفة لقواعد المرور، وعرض حياته وحياة الناس كلها للخطر. وفي الفيديو، فوجيء الشاب بسواق عربية نقل خبطته من ورا، وأطاحت بيه على الطريق من جنب في مشهد مرعب كان هيتسبب حوادث تانية. بعد كده، نشرت وزارة الداخلية المصرية على حسابها الرسمي في فيسبوك بيان رسمي كشفت فيه ملابسات الواقعة، وقالت إن تم ضبط سواق العربية الملاكي اللي ساقها بتهور، وهو اللي أدى لتعطيل الحركة المرورية وعرض سلامته وسلامة الناس للخطر في مشهد سينمائي المصريين مش متعودين عليه.
وأوضحت الوزارة في بيان: “تبين ظهور علامات تناول الشاب مواد كحولية حيث عثر بالسيارة على دفتري أوراق لف سجائر “بفرة” وأداة خاصة لتعاطي مخدر الأيس وعقار طبي مجهول، وتم اتخاذ الإجراءات القانونية وتولت النيابة التحقيق”.
سواق النقل
وكشف سواق العربية النقل اللي خبط الشخص المتهور ده على الطريق كواليس مطاردته للعربية، وقال إن مع تواجده على طريق السويس فوجيء بزحمة عربيات وملاحقة عربيات شرطة لعربية ملاكي سوداء كانت ماشية بسرعة جنونية وهو بيتنقل بين الحارات بتهور كبير وسايب باب السيارة مفتوح، وإنه كمان تعمد تعطيل العربيات اللي بتحاول تعدي منه.
السواق قال إنه كان بيحاول مساعدة الشرطة في القبض عليه، فخبطه من ورا وكسر الجزء الخلفي من العربية علشان يخفف من سرعته وتقدر عربيات الشرطة إنها تحاصره. السواق كمان أشار إن السائق كان جنبه واحد بيحاول يهديه ويسيطر على الموقف، بس ماقدرش.
القبض عليه
من جهتها، اتمكنت الأجهزة الأمنية من القبض على سواق الملاكي، واتوجهت ليه اتهامات بتعطيل حركة المرور وتعريض سلامته وسلامة المواطنين للخطر. وبعد القبض عليه، كان واضح عليه تناول مواد كحولية ومخدرات، وتم اتخاذ الإجراءات القانونية وإحالة المتهم للنيابة العامة علشان تحقق معاه.
“كان ممكن يموت من الضرب”
من ناحية تانية، كشف شخص اسمه يوسف، وهو واحد من اللي صوروا اللي حصل في مداخلة هاتفية مع واحدة من القنوات، إن الشاب ده كان بيعمل حركات مش طبيعية على الطريق، وبيشاور بإيده، وفضل مكمل في الطريق وكسر الكارتة وكمل سواقة. وقال كمان إن الشاب ده لما الناس نزلته مقالش أي حاجة وهو بيضرب من المواطنين، وكان بيتألم بس، وتابع كلامه وقال: “لولا إن في ناس حاشت عنه الضرب كان ممكن يموت” .
جدل بين المصريين بعد الاعتداء عليه
اتداول عدد كبير من رواد مواقع التواصل الاجتماعي مقطع الفيديو اللي بيظهر اصطدام عربية النقل التقيل بعربية السواق المتهور، وناس كتير أشادت بسواق النقل وناس كتيرة شافت إن ده فيه تأديب للسواق المتهور على سلوكه السيء على الطريق. بس كمان ظهر ناس بتندد بسلوك سواق النقل التقيل علشان ده كان ممكن يتسبب في مصيبة أكبر وحادثة بشعة أكتر، غير إنها مش مهمته ومهمة الأمن بس وإن ده مش الطبيعي.
الملفت إن انتقاد اللي عمله سواق النقل كان كمان من جهات رسمية زيّ اللواء مدحت قريطم، مساعد وزير الداخلية الأسبق للشرطة المتخصصة، اللي قال في مداخلة مع عمرو أديب عن إن سواق العربية النقل غلطان لإنه كان يمكن يقتل الاتنين الموجودين جوا العربية دي.
اللي زوّد الجدل ده هو الاعتداء على السواق من المواطنين العاديين بعد توقيفه، وظهرت مشاهد بيشدوه فيها من العربية وبيضربوه ضرب شديد على الأرض، وهي حاجة شافها البعض إنها عشوائية وفيها غياب للقانون اللي كان المفروض المواطنين دول يسيبوه ياخد مجراه ويتعامل معاه بدل من نشر العنف، إلا إن أطراف تانية شافت إن ده تأديب مناسب ليه.
العقوبة المتوقعة
يُعاقب القانون المتهم اللي بيسوق عربية بتهور ويهدد حياته وحياة الآخرين للخطر ومخالقة قواعد المرور بعقوبة الحبس وغرامة بتبدأ من 4 آلاف جنيه، ولا تزيد عن 8 آلاف جنيه، مع سحب الرخص منه على مدار مدة مش بتقل عن شهر وبتوصل ل3 شهور.
وبتُعاقب المادة 76 من قانون العقوبات للمرور، كل من قاد عربية وهو تحت تأثير المخدر وأثبتت التحاليل ده، بالحبس لمدة مش بتقل عن سنتين وبتوصل الغرامة ل10 آلاف جنيه، ولو أتسبب في إصابة أي حد، بيتم حبسه مدة مش بتقل عن سنتين ل5 سنين