فاكرين أشهر لقطة في تتويج منتخب الأرجنتين بكأس العالم 2022 في قطر؟ البِشت العربي اللي كان صاحب أشهر وأهم لقطة اتكلم عنها العالم كله لحظة تتويج بطل العالم لكرة القدم، تفتكر البِشت ده مصيره إيه؟
النجم الأرجنتيني ليونيل ميسي اتكلم في لقاء صحيفة (Ole) الأرجنتينية عن البِشت اللي تم تتويجه به بعد الفوز بكأس العالم، وقال إنه لسه محتفظ بكل شيء يخص تتويج الأرجنتين بكأس العالم 2022 في قطر، الأحذية والقمصان والبشت، وصرّح إنه هياخذ كل المتعلقات في شهر مارس الجاي لبرشلونة، وهيحتفظ بهم مع كل الأشياء اللي محتفظ بها في مسيرته الكروية وذكرياته فيها.
اللقطة دي في نهائي المونديال اتقال إنها هتلف العالم لسنين قدام، وصورة ميسي بالبِشت أو العباية الخليجي اللي تعتبر إرث تراثي كبير، وهو بيرفع كأس العالم، الصورة دي اللي هتتخلد في تاريخ كرة القدم وهيكون فيها لمسة عربية أصيلة، أي حد يشوفها هيسأل إيه اللي ميسي لابسه، فيعرف أكتر عن الثقافة العربية وتراثها.
“البشت” عبارة عن عباية منتشرة في بلدان الخليج العربي وعدد من دول الشرق الأوسط، بيلبسوها الرجال كرمز للوجاهة في المناسبات المهمة، وبتكون أطرافها معمولة من الدهب، وهي تراث للمنطقة من قرون.