اجتمع مجلس النواب المصري يوم التلات 14 من ديسمبر علشان يناقش بعض التعديلات على قانون الضرائب، والتعديلات شملت زيادة الضرائب على السفر خارج البلاد وزيادة على بعض السلع والخدمات داخل مصر.
وضح تقرير لجنة الموازنة والتخطيط في مجلس النواب إن التعديلات الجديدة على قانون الضرائب تهدف لزيادة إيرادات خزينة الدولة اللي اتأثرت بشكل سلبي بجائحة كورونا اللي لسه مستمرة لحد النهارده. واللي بدورها أثرت بقوة على بعض القطاعات الاقتصادية في الدولة.
الضرائب على السفر خارج البلاد هتزيد لـ 100 جنية، ولكن هتفضل 50 جنية زيّ ما هي للسياح الأجانب اللي بيزوروا محافظات البحر الأحمر وجنوب سيناء والأقصر وأسوان ومطروح.
أما كل المنتجات اللي بتتباع في المناطق الحرة بما فيها المشروبات الكحولية هتزيد الضرائب عليها بنسبة 2 لـ 3 %، وهتكون أقل قيمة للضريبة دولار ونص على أي منتج في المناطق الحرة. أعضاء السلك الدبلوماسي والقنصلي هيتم إعفائهم من الضرائب دي.
والتعديلات الجديدة هتزود الضريبة بنسبة 5% على كل المشروبات الغازية، و 2% على كل المنتجات المعمرة، وكمان هيزود الضريبة على الدخول للسينمات والمسارح والكازينوهات، لكن نسبة الزيادة بالظبط لسه ما تمش الإعلان عنها.
أما الضريبة على المنتجات اللي بتعتبرها الدولة رفاهيات زيّ أنواع معينة من السمك والعطور وساعات اليد هتزيد بنسبة 10%.