أعلنت مصر يوم الجمعة بالليل عن تجميد الطيران لسبع دول أفريقية بسبب إنتشار متحور جديد من فيروس الكورونا في دول جنوب أفريقيا، والدول اللي اتمنع الطيران المباشر عنها هي: جنوب أفريقيا وبوتسوانا وليسوتو وزيمبابوي وموزمبيق ووناميبيا وإسواتيني. وهيتم تطبيق مجموعة من الإجراءات الإحترازية على أي مسافرين يوصلوا مصر من الدول دي عن طريق الطيران غير المباشر، سواء كان ترانزيت أو غيره.
كان قرار مصر بمنع الطيران المباشر للدول دي جاء على خلفية ظهور المتحور الجديد من فيروس كورونا في الدول السبعة بالإضافة لإسرائيل وهونج كونج وبلجيكيا. ويوم الجمعة اللي فاتت كانت منظمة الصحة العالمية أعلنت إن المتحور الجديد من الفيروس خطير وسمته “أوميكرون”.
وضحت منظمة الصحة العالمية إن المتحور الجديد فيه طفرات كتير على البروتينات المسئولة عن دخول الفيروس للخلايا البشرية وبالتالي ده بيرفع خطر إنتقال العدوى وسرعتها وبيزود خطر حدوث إنتقال سريع للفيروس وبيزود مساحة الجائحة اللي بيسببها.
ووضحت المنظمة إن أول عينة من المتحور الجديد اتاخدت في جنوب أفريقيا يوم 9 نوفمبر، وإن المنظمة وصلها تقرير المتحور الجديد يوم 24 نوفمبر ومن وقتها وفي قلق بالغ بخصوصه داخل المنظمة في كل مكاتبها في العالم. مصر والسويد والإتحاد الأوروبي والولايات المتحدة منعوا الطيران المباشر من مجموعة دول في أفريقيا.
إيه هي الإجراءات الإحترازية الجديدة اللي هتطبقها مصر بخصوص السفر والمسافرين على خلفية متحور كورونا الجديد؟
أي مسافر هيوصل مصر من الدول الأفريقيةبطريقة غير مباشرة، من دولة تانية، هيتم فحصه في المطار. ولو المسافرين في مصر عن طريق الترانزيت هيتم فحصه في المطار ولو طلعت النتيجة إيجابية هيرجع المسافر تاني على نفس الطيارة للبلد اللي جه منها.
أما المسافرين اللي وجهتهم الأخيرة مصر هيتم فحصهم في المطار ولو النتيجة طلعت إيجابية هيتم برضه ترحيلهم على نفس الطيارة اللي جاءوا فيها وهيرجعوا للبلد اللي جاءوا منها. ولو نتيجة المسافر طلعت سلبية هيدخل حجر صحي في مسكنه لمدة 7 أيام، وبعدها هيتم عمل فحص تاني ليه ولو الفحص التاني طلع سلبي هتتابع وزارة الصحة معاه لمدة سبع أيام تانيين، أما لو النتيجة طلعت إيجابية خلال أيام الحجر الصحي فالوزارة هتتطبق على المريض البروتوكول وهتتابع معاه لحد ما يخف.
ووضحت وزارة الصحة إن الدولة بتستعد بكل طاقتها لأي خطر ممكن يحصل بسبب المتحور الجديد وإنها طلبت معدات طبية للحجر الصحي وكميات كبيرة من المتطلبات الطبية اللي ممكن نحتاجها في حالة حصول أزمة.
ولكن أخر تقارير الوزارة بتقول إن مافيش خطر واضح على مصر من المتحور الجديد وإن لحد دلوقتي ماظهرتش أي حالات مصابة بيه، وإنه مش من المتوقع إنه يدخل مصر ولا إنه يسبب مشكلة طالما كلنا واخدين بالنا ومطبقين قواعد التباعد الإجتماعي، وكمان وضحت إن منظمة الصحة العالمية مالقتش لحد دلوقتي أي علامات على المتحور الجديد من فيروس كورونا بتقول إنه ممكن يسبب عدوى بعد تلقيحات كورونا. يعني إن شاء الله الناس اللي واخدين اللقاح في أمان لحد دلوقتي.