الحكاوي اللي بتتحكي عن اللي بيحصل جوا الطيارات دايمًا بتاخد صدى واتجاه مختلف غير لو حصلت على الأسفلت، لإنك ببساطة بتبقى بين السماء والأرض، وفي أسباب اللي ممكن الطيارة بسببها تقلع وتضطر تهبط اضطراريًا كتير، منها أعطال فنية أو شخص جاله أزمة صحية أو الطيارة اتخطفت وهلم جرًا.
في أغرب سبب سمعناه عن تأخر رحلة طيران.. حصل بسبب سيدة مصرية وكانت على شركة طيران سعودية، وقت لما اضطر قائد طائرة (فلاي أديل) السعودية اللي كانت متجهة صباحًا من مطار القاهرة لمطار الملك عبد العزيز الدولي في مدينة جدة السعودية، إنه ينزل راكبة مصرية بشكل مفاجئ.
بناءً على مصادر من مطار القاهرة، بيحكوا إن الطيارة اتحركت على الممر وفي طريقها للإقلاع، ولكن اتفاجئت بإن في راكبة مصرية بتصرخ بشكل مفاجئ، ولما حاولوا يهدوها ويعرفوا إيه السبب اللي وصلها للحالة دي.
قالت إنها خلال اتصال هاتفي من زوجها المقيم في السعودية قبل إقلاع الطيارة، حصل بينهم مشاجرة كبيرة وتوعدها “بالضرب” عند وصولها بسبب خلافات عائلية، وقالت: “لإنه وقت علمه بتحرك الطائرة هددها بالضرب أول ما توصل لمطار جدة، وقالت إن كل اللي في وسعها تعمله في الوقت ده إنها طلبت إلغاء سفرها، فاضطر قائد الطائرة للرجوع وإنزالها وإلغاء سفرها، واستأنفت الطائرة رحلتها بعد تأخير 45 دقيقة عن موعد إقلاعها الأصلي.