يعتبر مرسال ستور واحد من مشاريع مؤسسة مرسال الخيرية، وربح المنتجات دي بيروح لدعم المرضى اللي تحت رعاية ومسئولية المؤسسة، فأنت ممكن ببساطة تشتري حاجة أنت بتحبها وفي نفس الوقت تعمل خير لغيرك، وتساهم في إنقاذ حياة مريض، وده من خلال الـ Booths اللي بتتعمل أو من خلال موقعهم الرسمي الخاص بالمنتجات وأنت في بيتك. طب مين مرسال؟ وإيه الدور اللي بتقوم بيه؟
مين هي مرسال؟
مرسال مؤسسة غير هادفة للربح، بتقدم خدماتها في القطاع الطبي زيّ عمليات زرع كلية وقوقعة، أو تبرع بتمن جلسات للعلاج الإشعاعي، وهكذا على مستوى كل الخدمات الطبية، وبتساعد في نشر الوعي الطبي والتوعية الطبية بصورة ممكن توصل للوطن العربي.
ده غير إنها بتعمل قوافل بتلف كل محافظات مصر علشان تساعد المحتاج. في قوافل خيرية بيبقى هدفها إنها توفر كل احتياجات المرضى من غير حتى مايطلبوا واسمها “قوافل الفرحة”، وفي قوافل تانية بتبقى مسئولة إنها تعمل فحوصات طبية في جميع التخصصات ولكل الأعمار في المناطق النائية والفقيرة اللي صعب يبقى متوافر فيها خدمات أو مراكز طبية.
وقوافل مسئولة إنها تلف مدارس مصر للكشف المبكر عن أمراض السمع والإبصار، وفي السنين اللي فاتت نظموا أكتر من 25 قافلة لأكتر من 6000 مستفيد، وفي أنواع تانية من القوافل هدفها الأول والأخير هو تقديم المساعدة.
طب إيه هي مشاريع مرسال؟
- مشروع خدمة الطواريء، واللي عن طريقها بتبقى مسئولة إنها توفر عربيات إسعاف للمريض في الحالات الحرجة، وده عن طريق خط ساخن خاص بيهم.
- مشروع حكاية صوت مشروع بيدعم جراحات زراعة القوقعة وتحسين التخاطب.
- مشروع لدعم مرضى الـPKU، وده يعتبر واحد من الأمراض الغذائية الأكتر انتشارًا عند الأطفال، ومرسال بتوفر ليهم كرتونة أكل شهرية للمرضى المصابين بالمرض ده. وتقدر تعرف أكتر عن المشاريع والحالات اللي محتاجة تبرع من هنا
دور مرسال في أزمة كوفيد-19
كانت من أهم المؤسسات اللي كان ليهم دور واضح في الجائحة، ساهمت في إنقاذ حياة كتير من مرضى كورونا، مع تدهور وانهيار القطاع الطبي في الوقت ده، بدأت تدعم القطاع كله بتوريد أجهزة التنفس الصناعي، وكل لبس التعقيم والأطقم الطبية في المحافطات اللي كانت محتاجة ده.
أما بالنسبة للحالات اللي كانت محتاجة لعناية مركزة، فكانت بتتواصل مع وزارة الصحة علشان توفر أماكن ليهم، ولو مفيش أماكن كانت بتتواصل مع مستشفيات القطاع الخاص وساعتها كانت المؤسسة بتتحمل التكاليف كاملة.
ده غير الجروب اللي اتعمل على الفيس بوك واللي عدى الربع مليون مشترك، وكان معظهم دكاترة كانوا بيقدموا استشارات للمرضى، وتشخيص للأشعة بشكل مجاني.
مؤسسة مرسال واحدة من أهم المؤسسات الخيرية في مصر، محتاجة لدعمنا ولتشجيعنا علشان تقدر تنقذ أكبر عدد من المرضى اللي في قوائم الانتظار.