من الحاجات المفتقدة عند كل ستات الدول العربية هي “الأمان” وإنهم يقدروا يعيشوا في مجتمع مايبصش على إنهم كائنات أقل منه، ونادرًا ما بنلاقي مجتمع شرقي بيبص للست زيّ الراجل، فإنك تلاقي دولة عربية تتحط ضمن تصنيف أفضل 100 دولة للست إنها تقدر تعيش فيه، تعتبر إنجاز كبير وخطوة مهمة بالنسبة لبلد زيّ السعودية، والمعروف عنها بـ”التذمد” أحيانًا.
والكلام ده وفقًا لتقرير اتنشر من مجلة أمريكية اسمها “Ceoworld” عن أفضل 100 دولة، الستات يقدروا يعيشوا فيها بأمان لسنة 2021، وده كان بناءً على دراسة اقتصادية لحوالي 256،700 ست من 156 دولة، وتم وفقًا لمعايير وعوامل كتير من ضمنها عوامل إقليمية وعرقية واجتماعية واقتصادية، كلها بتلعب دور كبير في تحديد أنسب بيئة ومجتمع تقدر تعيش فيه الستات.
ومن الدول اللي احتلت المراتب الأولى: السويد احتلت المركز الأول عالميًا، وبعدها جات الدنمارك وهولندا وكندا. أما على المستوى العربي، السعودية احتلت المركز الـ89 عالميًا، والأولى عربيًا وبعدها جات عمان والأردن والإمارات اللي خدت المركز الأخير والـ100، وباقي الدول العربية تم ترتيبها برضه بس خارج الـ100، وتقدر تشوف التقرير كله من هنا
زيّ مصر واللي احتلت المركز الـ124، وسوريا اللي احتلت المركز الـ153 وده يعتبر المركز قبل الأخير. أما بالنسبة لسبب اختيار السعودية، ده بيرجع للمحللين اللي شافوا الخطوات المميزة اللي مشيت فيها الدولة مؤخرًا، واللي بدأها ولي العهد السعودي محمد بن سلمان لتعزيز حقوق المرأة السعودية.
ومن بين أهم معايير التقييم والتصنيف: المساواة بين الجنسين، والنسبة المئوية للمقاعد التشريعية اللي بتتحكم فيها الستات، والشعور بالأمان، والمساواة في الدخل، والاهتمام بحقوق الإنسان، غير القدرة على تمكين الست ودمجها في المجتمع.
وأكيد مفيش دولة هتبقى أمان بنسبة 100% للست، بس على الأقل في دول أفضل من غيرها، الست تقدر تعيش فيها بأمان وبحرية ويكون فيها مساواة مع الرجال، من غير ماتحس إن ناقصها حاجة، وده اللي المفروض يتعمل في كل الدول العربية، مش كام دولة بس والباقي يبقوا خارج القائمة!