مسلسل موضوع عائلي مضاد للإكتئاب.. وطه الدسوقي ورنا رئيس مستقبل للكوميديا والدراما
بواسطة: ساره علي
مصنف إنه مضاد للاكتئاب، مسلسل موضوع عائلي, والحقيقة إنه موضوع عائلي جدًا. المسلسل بيتعرض على شاهد ومحقق مشاهدات عالية.
كنا محتاجين مسلسل زيّ ده، فالمسلسل بيعكس حياة العيلة المصرية, وبيعرضها بشكل بسيط وحقيقي وبتحس إنك عايش معاهم بجد في البيت وده اللي شد الناس إنها تتفرج عليه. وأنت بتتفرج ممكن تشوف نفسك أو عيلتك في المسلسل, وده اللي هيخليك عاوز تكمل كل الحلقات.
موضوع عائلي من إخراج أحمد الجندي, المسلسل بيحكي قصة إبراهيم اللي بيقوم بالدور ماجد الكدواني, إبراهيم بيكتشف إن عنده بنت وبشكل إجباري بيكون واصي عليها. ومع ظهور بنته، حياته بتتشقلب خالص.
ماجد الكدواني (إبراهيم)
إبراهيم اجتماعي ومحبوب وطيب جدًا والحقيقة ماجد الكدواني قِدر بكل بساطة وكالعادة إنه يحببنا في شخصية إبراهيم, ويوصل إحساس الشخصية في كل حالاتها وكإن ماجد وإبراهيم شخص واحد. شخصية إبراهيم ليها كذا جانب، منهم الجزء العاطفي اللي بيحاول إبراهيم إنه مايظهرش بشكل كامل وده اللي بيوصله ماجد الكدواني بشكل حلو جدًا. أما الجانب الفكاهي فماجد الكدواني بكل بساطة ومن غير أي تعقيدات هيضحكك يعني هيضحكك.
من أسباب نجاح المسلسل الممثلين, والكيميا اللي بينهم, واللي باين جدًا من أدائهم إنهم حابين العمل اللي بيتقدم, ده غير أدائهم المتقن للأدوار. وبشكل تلقائي من تعلقك بالشخصيات هتردد كلامهم بطريقة كل شخصية.
سناء في دور زينب، ممثلة متنوعة من بداية مشاركتها في الدراما، شاطرة وعندها مهارات كبيرة في التمثيل, وبظهورها في المسلسل أقنعتنا إنها قادرة تلعب كل الأدوار. وطبعًا المواهب الصاعدة في المسلسل لفتت نظر الجمهور بأدائها المميز, اتعلقوا بيها ومتوقعين نشوفهم في أعمال كبيرة الفترة اللي جاية.
طه الدسوقي (حسن)
كوميديا غير مفتعلة، مع أول ظهور لطه الدسوقي (حسن) هيلفت نظرك بأدائه الطبيعي والسلاسة في التمثيل. بينقلك من شعور للتاني وبيضحكك بكل بساطة.
طه قدر يوصل لقلوب كتير وبسرعة جدًا بخفة دمه، التفاصيل اللي أضافها طه للشخصية بتدخلك جوا موود المسلسل وكإنك عايش معاهم في البيت بجد. الكوميديا لعبة صعبة مش سهلة وعلشان تقدر تضحك المُشاهد بسهولة محتاج تكون ممثل شاطر, وطه ممثل شاطر بشهادة الجمهور اللي مستني يشوفه في أعمال مختلفة.
رنا رئيس (سارة)
سارة وضحت المستخبي عند رنا رئيس. قادرة تتحكم من أدواتها في التمثيل, ممكن تضحكك جدًا وتعيطك في المشهد اللي بعده. روحها حلوة وبسهولة تدخل القلب.
سارة شخصيتها عفوية, حساسة, واللي في قلبها على لسانها، وكل المشاعر اللي بتمر بيها بتوصل على طول للمشاهد، رنا بتقدم الشخصية بطريقة السهل الممتنع, ممثلة مجتهدة وشاطرة ومتنوعة. وطبعًا لازم نشكر المخرج أحمد الجندي على العمل الممتع اللي وفرلنا فيه كل عناصر العمل الدرامي العائلي الناجح، ورجع العيلة تتفرج تاني مع بعض. لو لسه ماتفرجتش على المسلسل، فالموضوع عائلي هو اختيار حلو جدًا في ليلة رأس السنة.