يوم 4 نوفمبر، كشف المخرج عمرو سلامة عن البوستر الرسمي لمسلسله الجديد “بيمبو”. المسلسل من بطولة أجمد مالك وهدى المفتي ومغني الراب ويجز، اللي يُعتبر المسلسل ده أول تجربة له في مجال التمثيل. المسلسل كان من المقرر بثه على منصة شاهد الرقمية، ووقت ما نشر سلامة البوستر، وعد الجمهور إنهم هيشوفوا “عمل مختلف جدًا”.
كان من المقرر عرض أولى حلقات المسلسل يوم 21 ديسمبر. ودلوقتي ومن ضمن فعاليات مهرجان القاهرة الدولي السينمائي، من المقرر عرض مسلسل بيمبو هناك! بجانب أبطال المسلسل شارك مجموعة كبيرة من الفنانين كضيوف شرف وكمان ظهور وجوه جديدة. ومن ضمن المشاركات كانت سينثيا خليفة اللي قالت في لقاء أثناء حديثها عن مشاركتها في بيمبو، إن “ويجز ممثل شاطر جدًا كإنه طول عمره بيمثل. الفنان يقدر يعمل أي حاجة”.
أما بالنسبة لويجز، فقال عن تجربة بيمبو في لقاء سابق “عمرو سلامة حمسني للتجربة وقالي إني هقدم حاجة حلوة، لكن ماكنتش واثق من نفسي في الأول ولكن بعدين لقيت الأمور لطيفة في الكواليس وعشت مع الأبطال وفريق العمل لحظات جيدة.” وقال كمان إن في أوقات تطلبت منه مشاعر مختلفة، مرة مشاعر لشخص شجاع ومرات تانية مشاعر متضاربة لشخص خايف وهكذا. وإن بالنسبة له التمثيل مختلف عن المزيكا، وإنه في النهاية بيضع مشاعر أكتر وصادقة.
الفترة دي هي فترة الجيل الجديد سواء في عالم الفن أو الغناء. فالشباب الجديد مكتسح الساحة وحاصل على دعم كبير من الجمهور، وعلشان كده ميكس ممثلين شباب ليهم شعبية كبيرة زيّ مالك وهدى المفتي، ومعاهم كمان ويجز اللي يعتبر من أكتر الأشخاص نجاحًا حاليًا في مجال الغنا، خلى الكل متحمس إنه يشوف طبيعية المسلسل اللي قدر يجمع كل دول مع بعض!