مفيش شك إن في أطفال لسه بتتعرض لمجموعة من الاضطهادات وحقوق بتتسرق وبتسلب طفولتهم اللي المفروض يعيشوها، ومؤخرًا شوفنا مجموعة من القرارات المهمة اللي اتقالت في اجتماع مجلس الوزراء برئاسة الدكتور مصطفى مدبولي بخصوص أوضاع الطفولة، وخلال الاجتماع وافق مجلس الوزراء على 3 قوانين هتساعد إنها تحمي الأطفال بشكل أكبر من أي أخطار ممكن يتعرضوا لها.
قوانين لتوسيع مظلة الحماية الاجتماعية على الأطفال
قانون عمالة الأطفال
في مداخلة هاتفية مع الإعلامية لميس الحديدي، قال “هلال” إن كانت عقوبة تشغيل الأطفال قبل التعديلات الجديدة كانت ضعيفة جدًا وكانت غير منصفة، فهنلاقي إن كانت في المادة 74 في قانون الطفل كانت العقوبة من 100 إلى 150 جنيه! بس دلوقتي بقت من 1000 جنيه لـ2000، وعقوبة الغلق وصلت لمدة ست شهور لأصحاب الورش والمنشآت باعتبارهم أكتر فئة بتستخدم الأطفال تحت السن القانوني وبتشغلهم.
كارثة عدم إثبات المواليد
في مشاكل كبيرة بتنجم عن تأخير إثبات المواليد خصوصًا في بعض المحافظات، واللي ممكن يسبب في توسيع عمليات الإتجار بالبشر والإضرار بهم، وعلى الأساس ده تم فرض عقوبة لا تزيد عن 1000 جنيه ولا تقل عن 500 جنيه.
عقوبة مالية على الوالد
تغليظ العقوبة المالية المقررة على والد الطفل اللي بينقطع ابنه عن الحضور للمدرسة أكتر من أسبوع والغرامة من 500 جنيه لحد 1000 جنيه.
كلها قوانين بتصب في مصلحة الطفل في المقام الأول وبتحميه من أخطار كتير ممكن يكون بيتعرض لها خلال مرحلة الطفولة، سواء من استغلال جسدي ونفسي أو حرمان من التعليم وغيره.