لما بنيجي نتكلم عن إطلالات الفنانات ومظهرهم العام في المناسبات العامة، أو حتي في حياتهم اليومية، بنلاقي إن كل فنانة بتنقي نوع الملابس وألوان الماكياج والإكسسوارات اللي بتحسسها إنها قريبة منها وبتعبر عن شخصيتها. ومن الفنانات اللي حافظت على مسار ثابت وهاديء من حيث اختياراتها في تسريحات الشعر، واللبس، والمكياج اليومي، هي هبة مجدي.
فمن المعروف عن هبة إنها بتميل للإطلالات الهادئة والناعمة، اللي بتدي إحساس بالرقي والبساطة. ولكن ده ميمنعش كمان، إنها في بعض الأوقات بتخرج عن المألوف بإطلالات منقدرش نقول إنها جريئة، ولكنها بالتأكيد مختلفة، فبتقدر تحقق المعادلة الصعبة بين إنها تكسر روتين إطلالتها التقليدية، وفي نفس الوقت مبتبعدش أوي عن شخصيتها في الأذواق اللي بتختارها، وعلشان كده جمعنالكم طلات مختلفة لهبة مجدي بتعكس فيها أجزاء مختلفة من شخصيتها.
في واحدة من أحدث جلسات التصوير اللي عملتها هبة، ظهرت بكذا لوك وماكياج كامل، فعدسة المصور شريف قمر التقطت لها إطلالات مختلفة، بين الشعر القصير والطويل والأسود والبني، وظهرت هبة بميك أب وأكسسوارات مختلفة طلعت الجانب الجريء واللي مش متعودين عليه في شخصيتها.
وفي جلسة تصوير لهبة بعدسة المصور شريف البوهي، ظهرت بإطلالة أنيقة وحادة. وده بعد ما لجأت لمكياج يُعتبر ثقيل وجريء مع استخدامها لأقراط ذهبية كبيرة، وكمان اختارت إن شعرها يكون منسدل للوراء علشان تكمل بيهم انطباع الإطلالة الكلاسيكية في الصور.
جلسة التصوير دي كانت مختلفة، ظهرت فيها هبة بالبيجاما وموقع التصوير كان في البيت (جنب الغسالة بالتحديد) علشان يضيفوا روح من المرح والتلقائية عليها، وكملت هبة روح التصوير دي باختيارها لماكياج ناعم، وتسريحة شعر بسيطة مرفوعة لفوق.
وفي اللوك ده استخدمت هبة ماكياج بألوان هادئة وسموكري علشان يبرز جمال ولون عينيها. وعلقت على الصورة دي عبر حسابها على الإنستجرام، وقالت إن الاختيار ده من الميك أب جديد عليها وسألت متابعينها عن رأيهم. بصراحة.. أكتر من رائع!
وفي واحدة من أجمل جلسات التصوير اللي عملتها هبة مع المصور المعروف أحمد رازق، ظهرت لمرة تانية بلوك كلاسيكي بس المرة دي في باريس. ولجأت للملابس ذات طابع رسمي وقديم، واستخدمت أقراط كبيرة، وقبعة كلاسيكية، وده خلى الصور تبان كأنها متاخدة من عصر تاني تمامًا، أقدم كتير من اللي إحنا عايشين فيه.
كل اللي اتكلمنا عنه حاجة، وإطلالاتها (كلها) على السجادة الحمراء حاجة تانية خالص. فهبة مستحيل تخفق في إنها تجذب الأنظار في أي مهرجان بسبب شكلها اللي بيبقي مفعم بالأنوثة والرقي، وبشوية تفاصيل بتهتم بيها علشان تدي لمسة من الجراءة كمان. فظهرت هنا في فستان مخمل باللون الأسود وتصميم ديل السمكة، مع حقيبة كلاتش سوداء، وأقراط ماسية راقية بتضيف لجمال الفستان.