بمناسبة اقتراب عيد الأضحى المبارك، أعلن بنك الكساء المصري عن تعاونه مع علامة زارا التجارية في إطلاق مبادرة خيرية جديدة بتهدف لتشجيع المواطنين على التبرع بملابسهم لمحتاجيها.
المبادرة وفرت صناديق كبيرة للتبرع بالملابس في كل فروع زارا بمصر، وبالطريقة دي هتسهل عملية التبرع على المواطنين اللي هيساهموا في مساعدة غيرهم سواء بملابسهم اللي مش محتاجينها، أو بملابس جديدة من أي محل بيفضلوه وهما بيتسوقوا أو بيشتروا ملابس جديدة لأنفسهم.
صناديق التبرع بالملابس هتكون متوافرة في فروع زارا حتى بعد أجازة العيد، والمبادرة دي هتساهم في تكملة مسيرة بنك الكساء المصري اللي بيساعد أكتر من مليون مواطن في جميع أنحاء مصر عن طريق التبرعات، والابتكارات الجديدة اللي بتهدف لإيجاد برامج فعالة تقدر تعالج المشاكل المتعلقه بالكساء بصفة مستمرة في إطار مؤسسي.
بنك الكساء المصري هو مؤسسة أهلية غير هادفة للربح أُنشئت سنة 2015 تحت مظلة بنك الطعام المصرى، وبنوك الخير اللي بتهدف لتوفير الاحتياجات الأساسية للمحتاجين فى كل المحافظات المصرية. والبنك بيتخصص فى توفير الملابس، والمنتجات الجلدية، والمفروشات، و إحتياجات الكساء، والغطاء اللي تقدر تضمن للإنسان معيشة كريمة آمنة طول السنة.
أنشطة البنك بتتميز بالفرز الدقيق للأصناف اللي بيتم تجميعها، وبعد الفرز بيتم تصليح الملابس اللي محتاجة لإصلاح، وإعادة تدوير الملابس القديمة، وتغيير بعض الأصناف لأصناف أخرى بحيث تكون ملائمة لبيئة وثقافة المُتلقي المُستحق للتبرعات، والبنك بيقوم كمان بالتبرع بالملابس والأقمشة الجديدة للمحتاجين عن طريق قاعدة البيانات اللي بيجمعها البنك ويجددها باستمرار علشان يضمن التوزيع العادل للتبرعات على حسب حاجة كل الفئات المُستهدفة.