دايمًا احنا كمشاهدين بنتحمس لأي ثنائي اشتغلوا مع بعض وأثبتوا نفسهم والناس حبتهم. ومش بنكتفي أبدًا بعمل أو اتنين لهم مع بعض وبنبقى عايزين أكتر. لإننا ببساطة بنبقى حبيناهم على الشاشة والكميا اللي ما بينهم قدرت توصل للجمهور. وده مش سهل إنه يحصل بين صناع العمل الفني في يوم وليلة. ومن ضمن الدويتوهات الناجحة اللي شوفناها مؤخرًا وكانت مميزة ونتمنى إنها تتكرر تاني. كان دويتو بيتر ميمي وكريم محمود عبد العزيز.
ازاي موهبة كريم عبد العزيز لمعت مع بيتر ميمي؟
الناس حبتهم مع بعض بعد فيلم موسى وفيلم من أجل زيكو ومستنيين يشوفوهم في أعمال تانية جديدة. هنلاقي فيلم موسى اللي اتعمل السنة اللي فاتت كان من أفلام الخيال العلمي. الفيلم ده ظهر موهبة كريم عبد العزيز اللي كانت مدفونة في وسط الأعمال اللي كانت بتاخد جو الايت كوميدي. وماكانتش بتظهر الوش التاني لموهبته بس قدر بيتر ميمي إنه يخرجها للناس من خلال شخصية يحيى المصاب بالتوحد وماكانش عنده أي أصحاب فيقرر إنه يعمل روبوت ويسميه موسى ويبقى هو صاحبه. الفيلم حقق نجاح كبير على المستوى الجماهيري وشباك التذاكر. والناس اتكلمت عن كل عناصر الفيلم اللي كانت متناغمة مع بعضها وطلعت في الأخر عمل مميز. واتكلمت عن أداء كريم اللي أخد على أساسه جائزة أحسن ممثل في مهرجان نجم العرب. وبالمناسبة فيلم موسى كان تكملة لسلسلة المستضعفون بعد فيلم الهرب الرابع اللي اتعمل في 2016 وكان من بطولة أحمد حاتم.
والمشاركة التانية لهم كانت في فيلم البحث عن زيكو اللي بيتعرض حاليًا في السينمات. كان بطولة كريم ومنة شلبي والفيلم ده الناس اعتبرته ناجح أصلًا من قبل ما ينزل وده لأسباب كتير. كان أولها إن ده كان التعاون التاني بين بيتر وكريم بعد موسى فكانوا متحمسين إنهم يشوفوا حاجة عظمة زيّ اللي فاتت. وأغنية الغزالة الرايقة اللي حققت نجاح جماهيري كبير من قبل ما يتعرض للفيلم واللي غنى فيها كريم مع الطفل. وتوقيت ظهور منة شلبي بعد ترشيحها لجائزة الإيمي، كل دي عوامل مهدت لنجاح الفيلم.
بيتر ميمي صانع النجوم
أعمال بيتر تشهد له في تاريخ صناعة النجوم، هنلاقي مثلًا النجم أمير كرارة وسلسلة نجاحاته المتكررة وبداية نجوميته الحقيقية كانت معاه. في مسلسل كلبش بكل أجزائه اللي حقق نجاح جماهيري كبير والناس بعدها كانت ماشية تقول له “باشا مصر” ودخل بعدها أمير في سكة تانية في النجومية وإنه يبقى نجم شباك. وبعدها عمل معاه مسلسل الاختيار الجزء الأول وفيلم حرب كرموز وكل دي أعمال صنعت نجومية أمير.
وفي مسلسل الأب الروحي مش بس صنع نجومية نجم واحد لأ ده صنع نجوم شباب كتير كانوا في العمل وكل واحد فيهم كان له دوره ومساحته اللي قدر يبدع فيها. وبعد العمل ده كلهم طلعوا للجمهور في أعمال مختلفة، وهي دي شطارة المخرج إنه يقدر يطلع من الممثل الإمكانيات المستخبية ومش بس يخليه يظهر موهبته بشكل صح. لأ ده كمان يخليه نجم شباك ويحقق إيرادات ودي معادلة صعبة.