الهشاشة النفسية وازاي في ناس بقوا أكتر هشاشة ورقة في مواجهة ضغوظات الحياة بشكل يخليهم إنهم يتكسروا ببساطة مع أي مشكلة حتى لو ماكنتش تستحق كل ده، وبيضخموا أي صعوبة ممكن يقابلوها وكإنها كارثة وجودية ومالهاش حل، طب إيه اللي ممكن يوصلنا للمرحلة دي من الهشاشة النفسية؟
في كتاب إسماعيل عرفة اللي اتكلم فيه عن الهشاشة النفسية وعن أسبابها، قال إنها ممكن تكون بسبب إن الشخص ده اتربى على الاعتمادية وعدم تحمل المسئولية من وهو صغير فبيكبر يلاقي في فجوة كبيرة بين خبرته في الحياة وبين الواقع اللي هو عايش فيه فبيحصل له حالة من الصدمة وبيقف مكانه وهو مش عارف يعمل إيه، من ضمن الأسباب برضه التوقعات المزيفة اللي بتبقى عند الشخص تجاه أي حاجة في الحياة سواء أشخاص أو نتيجة معينة عايز يوصل لها، فبيتصدم برضه. والفراغ الوجودي ممكن يوصل لنفس النتيجة إن الشخص ممكن يبقى حاسس إن مالوش قيمة في الحياة.
ومن أهم الأسباب اللي بنحط تحتها خطوط كتير واللي في الغالب بتبقى أساس مشاكل كتير هي: التربية والبيئة اللي طلع منها سواء في المدرسة أو غيره وكم الإحباطات والتراكمات والصراعات النفسية والخسائر اللي اتعرض لها اللي ممكن تخلي الشخص مايبقاش عنده أي استعداد في مواجهة ضغوطات الحياة.
والكاتب بيطرح سؤال مهم أو نتيجة ممكن للناس اللي بتعاني من الهشاشة إنها توصل لها وهو هوس المرض النفسي، والناس اللي ممكن تهول من الحزن الطبيعي اللي ممكن نحسه في أي وقت أو من أي مشكلة ممكن الشخص ده يقابلها لو حتى كانت بسيطة، إنه يجري على الدكتور النفسي مع إن المشكلة ممكن ماتكونش محتاجة أصلًا وكانت ممكن تتحل لو تقبلنا مشاعرنا وحزننا وسبنا لنفسنا الوقت الكافي علشان نرجع زيّ الأول، لإن ساعات ممكن يكونوا شوية زعل ونقول عليهم اكتئاب وناخد أدوية وندخل في دوامة تانية مابتنتهيش لمرض ممكن مايكونش عندنا أصلًا، ومع ذلك!…. ومانقدرش ننكر إن الطب النفسي من الحاجات اللي احنا ممتنين لوجودها دلوقتي في حياتنا لإن في ناس محتاجة فعلًا إنها تروح لمختص نفسي ولإن ممكن تكون مش عارفة تحل مشاكلها لوحدها أو محتاجة لدعم نفسي ونصائح من حد فاهم ودارس مش مجرد كلام مرسل ممكن يتقال من أي حد زيّ “كله هيعدي” وغيره من الكلام اللي ممكن مايساعدش الشخص إنه يخرج من اللي هو فيه.
الصعوبات موجودة وكده كده هنقابلها بس بيختلف استجابة كل شخص للمشكلة اللي بيواجهها واللي بتخليه إما يواجه أو ينهار ويقع ومش بيبقى قادر يكمل من غير مصدر للدعم النفسي حوليه، وعلشان نتجنب إننا نوصل للمرحلة دي من الهشاشة، أهم عامل هو التركيز على نفسنا في الأول وفي الأخر نهتم بها ونحبها لإنها هي اللي تقدر تدينا الدعم والتقدير وقت ما احنا بنحتاجه.
