للترطيب: وصفات طبيعية من الكركديه لبشرة نضرة

مش بس زيّ ما اتعودنا إنه مشروب مفيد وبيتوصف دايمًا لمرضى الضغط، وإنه مشروب رمضاني مميز برضه، الكركديه كمان له فوايد كتير للبشرة وفعالية في الترطيب والنضارة والمحافظة على البشرة من التجاعيد والخطوط الرفيعة، وفوايد تانية كتير، بوصفات طبيعية من غير أي كيماويات، علشان تحافظوا على بشرتكم من الجفاف اللي بيخلي شكلنا أكبر من سننا حتى.

عن: هي

للبشرة الجافة، ممكن تستعمل قناع من الكركديه وجل الصبار، هتخلط معلقتين من الكركديه الباودر وقدهم تقريبًا من جل الصبار، وتعمل منهم عجينة ناعمة من غير تكتلات عن طريق التقليب الجيد، بعدها اغسل الوجه ونشفه كويس، وحط الماسك، حوالي ربع ساعة بعدها دلكه بحركة دائرية، واغسله بالمياه. الماسك ده للترطيب وممكن تستخدمه مرتين أو تلاتة في الأسبوع.

أما لعلاج الحبوب، هنحضر معلقتين من الكركديه الباودر مع كوباية زبادي، ونمزجهم مع بعض كويس ونحط الخليط على الوجه، وبأطراف الأصابع هنعمل تدليك خفيف بحركة دائرية، وممكن نكرر الوصفة مرتين أو تلاتة في الأسبوع، هنلاحظ فعالية في القضاء على حب الشباب.

للنضارة والتقليل من علامات تقدم السن والتجاعيد، هتحضر معلقتين كركديه باودر، ومعلقتين عسل، وزيّهم من اللبن، وتمزج المكونات مع بعض وتقلب علشان تتخلص من التكتلات، بعدها برضه نغسل الوجه ونحط الماسك، وندلك بشكل دائري، لمدة ربع ساعة، وبعدها نغسل الوجه بمياه بس.

آخر كلمة: ماتفوتوش قراءة: لتعويض قلة الترطيب في رمضان: وصفات طبيعية للعناية بالبشرة

تعليقات
Loading...