صاحب كاريزما وحضور، نجم من نجوم جيله، قدر يخلينا في أعماله نعيط بحرقة ونضحك من قلبنا، وفي عيد ميلاد الكاريزما كريم عبد العزيز، هنضحك بس من خلال إيفيهاته المكتوبة في أفلامه وشهرتها من شهرتهم، وزي ما كانت دايمًا بتضحكنا، هنحاول نستخدمها ونشوف امتى نقولها على مواقف تنفع في حياتنا.
- “حازم حازم.. بسيوني بسيوني”، ودي تقولها لما تدخل الامتحان وتبقى ناوي تحل بشات جي بي تي وتلاقي الامتحان نفسه معمول بشات جي بي تي، أو لما تكونوا بتحلموا انتوا وأصحابكوا بكلية من كليات الفضاء الواسع أو صحبة المنال وتبنوا أحلام على البالطو الأبيض وتلاقي التنسيق حدفكوا في معهد طرشوخ الليف.
- “نحن نختلف عن الآخرين خالص” .. الإيفيه ده هايل ويليق أوي لما تكون لسه متخزوق من علاقة وتقابل ريد فلاج جديد، بيبقى عندك كم من الخبرات يخليك تدخل بقلب جامد وتقول “نحن نختلف عن الأخرين .. خالص”
- “هنرجع بس مش دلوقتي”، جملة في وقتها كانت تهزك من جوا وتهز وطنيتك وعروبتك، بس بقدرة قادر اتحولت لإيفيه ينفع أوي تقوله في كل المواقف المتأجلة.. لما مدرب الجيم يكلمك يقولك هترجع تدرب امتى؟ ترد بكل ثقة وتاخد من أداء كريم عبد العزيز وتقول “هنرجع بس مش دلوقتي”.
- رجع فلوسك يا باشا احنا مابنشحتش .. طبعًا مش محتاجة شرح هنقولها فين، لما الشركة تحاول تستنصح عليك وتصرفلك زيادة 100 جنيه مخصوم ضرايب.
- “يا ريتني ما سألت” وده لما تبص في محفظتك وتلاقي إنه مش فاضل معاك غير عشرة جنية، وبمنتهى البراءة والسذاجة والاوعي تسأل احنا كام في الشهر .. فطبيعي هتحضر جملة “يارتني ما سألت”
- أمين ولد أبو جليل ولا أمين ولد الطحاوي .. ودي تتقال لما واحدة تقولك في أول قاعدة تعارف “محتاجة حد يبقى أمين عليا” ..
- “أنا اللي كلت الجبنة” لما حد يقعد يفرشلك في عيوبك وأنت عملت وأنت صاحب البلاوي، وإنك التوكسيك في رواية أحدهم وأنت المسؤول عن خرم الأوزون والتغير المناخي، ماتحرموش من حاجة واختمهاله بـ”وأنا كمان اللي أكلت الجبنة”
قولوا لنا إيه أكتر إيفيه بيعبر ومطبع على مواقف حياتكوا المختلفة.