صور جديدة انتشرت للقاء في سقارة من أمام هرم زوسر المدرج جمع ما بين وزير السياحة والآثار خالد العناني والفنان المصري خالد النبوي، لمناقشة آخر فيلم ترويجي جديد للسياحة المصرية، اللي هيقوم النبوي بدور البطولة فيه، وهيهدف لرفع الوعي الآثري وتعريف المصريين بمدى عراقة حضارتهم.
الوزارة شغالة على عدد من الأفلام التوعوية الفترة دي وبيتم تصويرهم في عدد من المواقع السياحية المصرية المختلفة، على رأسها سقارة، والخطوة دي جاية في إطار خطة لتشجيع المصريين على السياحة الداخلية وأنواعها المختلفة، مع تركيز شديد على السياحة الثقافية.
اختيار خالد النبوي جه لدوره الكبير في تشجيع السياحة المصرية بعد الآثرية اللي دشنها على مواقع التواصل الاجتماعي تحت اسم “Come to Egypt”، لتشجيع كل سكان العالم على السفر لمصر والتعرف على تاريخها العريق وحضارتها الأزلية.. ده بالإضافة لكونه من أهم الفنانين المصريين اللي مثلوا في عدد من الأفلام العالمية وتأثيره الملحوظ في رفع المستوى التوعوي في السينما المصرية.
وزارة السياحة والآثار في الشهور اللي فاتت ركزت على السياحة الداخلية والسياح العرب بمجموعة من المشاريع التوعوية أهمها أغنية “مصر أرض الجمال” واللي نزلت بمناسبة العام الجديد 2021 وفيلم “رحلة سائح في مصر” اللي بيوري العالم كله كم التنوع السياحي في مصر.
وبجانب كل ده، الوزارة شغالة على عدد من المشاريع العملاقة منها المتحف المصري الجديد وتجديد عدد من القصور التاريخية وافتتاح متاحف جديدة تبين مدى العمق التاريخي في مصر.. ده طبعًا بالإضافة لكل المنشآت الفندقية الجديدة والبنية التحتية من مطارات وشبكة طرق وخدمات مختلفة لضمان أفضل تجربة سياحية لكل الوافدين.
ومن الواضح إن إحنا على أعقاب نقلة جديدة في السياحة المصرية هتركز على المواطن المصري زيّ السائح الأجنبي، وعلشان كدا بنتمنى كل النجاح لكل من الفنان خالد النبوي وخالد العناني وزير السياحة والآثار المصري في الفيلم الجديد ومش قادرين نستنى عشان نشوفه.