كل اللي محتاجة تعرفيه لو في حد بيضايقك على النت تعملي إيه؟

التحرش والمضايقات اللي بتتعرض لها الستات والبنات على النت كتير، من أول الصور اللي بتتبعت على الرسايل الخاصة من رجالة ماتعرفهمش، لحد التحرش اللفظي والتهديدات.

لو كنتِ بتتعرضي لأي نوع من التحرش والمضايقات على النت وقلقانة ومش عارفه تعملي إيه، احنا هنشرح لك بالظبط الخطوات اللي تاخديها علشان توقفي المتحرش عند حده بالقانون.

ظهر مؤخرًا نوع من الوعي القانوني بين الستات والبنات في مصر عن “الجرايم الإلكترونية”، وعرفنا إن التحرش والمضايقات على النت تعتبر جريمة يعاقب عليها القانون، وده بيدي الستات قوة للتصدي للمتحرشين، لكن ممكن يبان لبعض الستات إن الطريق القانوني معقد وطويل، وده اللي بيخليهم يتخلوا عن فكرة الإبلاغ.

اتكلمنا مع زياد رحيم، المحامي المصري بالاستئناف العالي، وناقشنا معاه الطرق القانونية للإبلاغ عن التحرش والمضايقة الإلكترونية، وفي المقال ده هنشرح لك ازاي تتأكدي إن اللي بيضايقك هيتعاقب.

حد بيستظرف أو بيتحرش أو بيهدد أو مجرد بيضايقك على النت؟ بلغي متسكتيش

بيقول زياد: “لو في حد بياضيقك ومتربص لكِ على النت، روحي على مديرية الأمن التابعة ليكِ، واعملي محضر في مباحث الإنترنت وهما هيجيبوه”.

سألنا زياد عن نوع الأدلة اللي محتاجة تاخديها معاكِ وأنتِ بتبلغي، وقال: “لو على الواتساب، ماتسجلش الرقم، علشان الرقم يظهر في السكرين شوت، وتطبع الشات وتتأكد إن الرقم ظاهر، وتقدمها مع المحضر”.

وبيوضح زياد إن القضية لما بتروح المحكمة بتحتاجي تقدمي تقرير بالمكالمات اللي حصلت بين رقمك ورقم المتهم، وده بسيط. بيضيف زياد إن المحكمة بتديكِ طلب بيقدمه المحامي لشركة الاتصالات الخاصة بكِ، وهما بيسلموا سجل المكالمات بالكامل موجه للمحكمة.

سألنا زياد إذا كان التحرش على فيسبوك أو إنستجرام أو تويتر، يعني مافيش رقم يظهر في الشات، وقال: “أي منصة تواصل اجتماعي بناخد سكرين شوت ونطبعها ونقدمها مع المحضر، والمباحث بتعمل شغلها وتتبع الحساب علشان تجيب صاحبه اللي ارتكب الجريمة دي”.

بيأكد زياد إن الشكاوى اللي زيّ دي بتاخد رقم جنحة، وبتتعرض على النيابة وتترفع للمحاكمة، وبيتحكم على المتهم فيها بالحبس والغرامة وبيتعمل له محضر عدم تعرض، لضمان سلامة البنت اللي بلغت عنه.

إيه الحاجات اللي تبلغي عنها ويعتبرها القانون جريمة إلكترونية؟

بيقول زياد: “التحرش اللفظي والجسدي وخدش الحياء، وأي حاجة تحصل وتعتبرها المُبلغة تحرش غير راضية عنه بيعتبر جريمة إلكترونية، وبيتعاقب عليها المُرتكب في القانون المصري”.

بس بيأكد زياد إن لازم يكون فيه شهود وإثبات على الجريمة، ولما سألناه وضح: “شهود يعني ناس كانت حاضرة الموقف والشخص ده بيضايقك على النت أو بيتحرش بكِ، أو كاميرات ممكن تتفرغ بأمر من النيابة”.

وبيضيف: “إثباتات زيّ التحرش اللفظي أو خدش الحياء عن طريق منصات التواصل الاجتماعي، وده بيكون في الشات اللي اتطبع واتضمن في المحضر اللي بلغتِ بيه”.

في النهاية، بيوضح زياد إن البنات اللي بيحصلها أي مضايقة أو تحرش على منصات التواصل الاجتماعي لازم تبلغ، لإن القانون المصري مؤخرًا بيحاول ينشط بشكل كبير ضد النوع ده من الجرايم اللي بتحصل على النت، وبيقول زياد إن بلاغك ده هيساعد القانون يتحرك وينشط ويطور من نفسه.

والبلاغ هيؤدي لعقوبة، والعقوبة هيتم نشرها على وسائل التواصل الاجتماعي، وبالتالي بنات أكتر هتبلغ ومتحرشين أكتر هيخافوا يعملوا كده، وبيوضح زياد إن المتحرشين غالبًا بيفتكروا إن المضايقات اللي بيمارسوها على النت ماتعتبرش جريمة، وبالتالي بيعملوها بأريحية.

آخر كلمة: ماتفوتوش قراءة: حكم نهائي: النقض تؤيد حكم الإعدام على قاتل نيرة أشرف طالبة المنصورة

تعليقات
Loading...