نشرت هند سعيد صالح، قصة حصلت لزوج صاحبتها اللي اتعرض لهجوم شرس من كلب بتربيه جارته في العمارة، وصاحبة الكلب مذيعة مشهورة وبتربيه في شقتها وده مسبب خوف للسكان، ولما حاول الضحية يتكلم معاها بخصوص تربية الكلب والسيطرة عليه، هجم عليه الكلب فجأة والناس خلصوه منه لكن بعد ما اتصاب إصابات بالغة.
الواقعة حصلت لشخص اسمه محمد محب الماوي، وبيشتغل مدير بنك. زوجته إيمان عبد المحسن، اتكلمت عن تفاصيل الواقعة في مداخلة لبرنامج الحكاية مع الإعلامي عمرو أديب، وأكدت إن زوجها كان راجع من الشغل ومعاه طلبات للمنزل، وتوجه للشقة الموجود بها الكلب علشان يطلب منهم ربط الكلب، وقالت: “أول ما زوجي خبط على الشقة وفتحوا الباب الكلب هجم عليه وبشكل مدروس، وعضه في إيده اليمين، وابني حاول يساعد والده عشان يبعد الكلب عنه لكن ماعرفش”.
هند سعيد صالح قالت إن بعد الفحوصات أكدوا إنه هيحتاج عملية نقل أعصاب من القدم للذراع اللي تم تمزيقه، بعد إجراء الفحص الطبي المطلوب، دخل محمد غرفة العمليات، وبعد ما أخد حقنة التخدير توقف قلبه لمدة ٣٠ دقيقة تقريبًا ودخل فى غيبوبة، وأخد صدمات للقلب واتنقل للرعاية المركزة، واتأجلت العملية لأجل غير مسمى لحد ما يرجع مرة أخرى للحياة.