مانقدرش ننكر إن في قوانين تم تعديلها مؤخرًا في مصلحة الست وكان منهم تشديد عقوبة التحرش وختان الإناث، بس لسه في قوانين بيتم إساءة استخدامها ضد الست ومحتاجة تتغير أو على الأقل تبقى الست فيها مساوية للرجل زيّ عقوبة الزنا أو جرائم الشرف.
الاغتصاب الزوجي
عمل جدل كبير على الساحة في الفترة الأخيرة، خصوصًا لما الناس بدأت تطرحه في وسائل الإعلام وفي الأعمال الفنية وده خلى مساحة كبيرة للناس إنها تتكلم بشكل أكتر أريحية وحرية عن الأزمات اللي بتتعرض لها في الجواز، ومن ضمنها الاغتصاب الزوجي، ولقينا إن في دول كتير بتجرمه شفهيًا بس على أرض الواقع مفيش قانون في مصر فعلي بيقول إن اللي عمل كده في مراته يتعاقب، ببساطة لإن مصطلح الاغتصاب الزوجي نفسه مش موجود في نص القانون، أو القانون نفسه مش معترف إن ممكن يكون بيحصل بين الرجل ومراته. أه في عقوبة للمغتصب بس اللي بيعمل كده مع واحدة غير مراته، بس مفيش قانون بيجرم “المغتصب الزوج”. والكلام ده وفقًا لجريدة الشروق اللي اتكلمت عن مفهوم الاغتصاب الزوجي ونصوص القوانين في كل الدول العربية، وتقدر تشوف التشريعات دي من هنا
قانون الزنا
ينص قانون العقوبات في مادة 276، على أن عقوبة جريمة الزنا هي السجن 6 شهور للزوج وسنتين للزوجة، لكن في حال تنازل الزوج، يتم وقف تنفيذ العقوبة حتى لو أصدر حكمًا نهائيًا على المتهمة بالزنا.
وده بيقول إن عقوبة الزنا في قانون العقوبات المصري بمواده من المادة 273 وحتى المادة 276 عقوبات تنص على إن في تفرقة بين الرجل والست في العقوبة نفسها! مع إنهم الاتنين في نظر القانون والناس والدين غلطوا! طب ليه في فرق في العقوبة؟ احنا مش بنقول نخفف العقوبة على الست بس على الأقل يبقى في مساواة.
ده غير إن الزوج بيعاقب على الزنا في حالة إنها لو حصلت في بيت الزوجية أو في مسكن خاص به، لكن لو حصلت في مكان هو مالوش علاقة به “أوتيل مثلًا” تسقط جريمة الزنا! في حين إن جريمة الزنا بتلحق بالزوجة وبيتثبت عليها في أي مكان حصلت فيه حتى لو برا مسكن الزوجية! وده طبعًا بيدي مبرر لأصحاب النفوس الضعيفة من الرجالة إنهم يخونوا عادي طالما كان برا البيت لإنه مش هيتمسك عليك حاجة!
جرائم الخيانة الزوجية “الشرف”
قتل الزوج لزوجته في حالة خيانتها له بتقع تحت بند القتل المخفف “القتل الغير مخطط له” واللي عقوبته بتصل من حبس مدته 24 ساعة لـ3 سنين، ولكن لو الزوجة اكتشفت خيانة زوجها وقتلته، في الحالة دي يعتبر جناية قتل عمد واللي ممكن توصل للسجن المشدد أو الإعدام! تفرقة حتى في عقوبة القتل! مع إن ده قاتل ودي قاتلة! والاتنين قتلوا لنفس السبب! ولو هنتكلم من ناحية الدين الاتنين عقوبتهم في الأديان واحدة! طب ليه القانون بيفرق بينهم؟
قانون الأحوال الشخصية
القانون بيعاقب الزوج في حالة ضربه لزوجته ده شيء طبيعي وبديهي، بس في ثغرة في القانون بيستغلها بعض الأزواج وهي “الضرب لتأديب المرأة” أو “التعنيف من أجل التأديب” وده لإن جزء من القانون المصري بيرجع للشريعة واللي بتقول ضرب الزوجة الناشز، بس الناس أساءت فهم الجملة أو قصدها، وبدأوا يستخدموها حجة لتبرير ضرب الزوجة والتعدي عليها، يعني الدين اتعرض لظلم في فهم محتواه أو مقصده والقانون أساء في الطريقة اللي وضعها بيها!