قلوب وفراشات طايرة على مر الزمن: ليستة أغاني عيد الحب
ماينفعش نفوت شهر القلوب والدباديب والحب من غير بلاي ليست. عملنا لكم مقالات عن هدايا تجيبوها وأماكن برا الصندوق تخرجوا فيها، حتى السؤال البديهي للسناجل سألناه وناقشناه. دلوقتي جيه وقت الأغاني اللي تسمعوها بقى في عيد الحب، هنقترح عليك أذواق مختلفة من أزمنة مختلفة كمان.
التسعينيات
واحدة من أهم الحقب التاريخية للأغنية الرومانسية، طلع فيها عدد كبير من النجوم واتشهروا، والمعروف كمان إن وقتها الأغنية بيتعملها فيديو كليب، وطبعًا كل ما تزود في الرومانسية كل ما تاكل الجو.
أشهر ملوك الحقبة دي محمد فؤاد، إيهاب توفيق، عمرو دياب، حميد الشاعري، أصالة، مصطفى قمر، هشام عباس، جورج وسوف، كاظم الساهر، صابر الرباعي، راغب علامة، طلعت زين، عايدة الأيوبي.
هنقولكم على أشهر أغاني الحب والرومانسية في التسعينيات، واللي بنقترح عليك تسمعها مع حبيبك في عيد الحب وأنتم خارجين.
ولمصطفى قمر، لقينا حد مجمع له 21 أغنية على بعض، استمتعوا بيهم.
أوائل الألفينيات
هنا حصلت طفرة لطيفة، أهم أحداثها كان ظهور فنانين على الساحة كل واحد فيهم يعمل أغنية تكسر الدنيا، لكن بعدها يختفي ومانعرفش عنه حاجة لحد دلوقتي، أو يعمل أغنية وحدة هي للي تتشهر والباقي مايتعرفوش. بغض النظر عن مصير كل واحد فيهم، خلينا نستمتع بالأغاني اللي عملوها قبل الاختفاء.
كمان في الفترة دي، شوفنا فرق موسيقية قدموا شكل جديد للموسيقى الجديدة، أشهرهم فرقة واما اللي لحد دلوقتي بنسمع منهم موسيقى مميزة ولايقة عليهم، أشهر أغانيهم زمان كان منها الحزين ومنها اللي بأسلوب “انكش حبيبك”، زي أغنية تحلفلي أصدق، هو مش بيعاتبه ومش بيبكي عليه، لكن بينكشه كده باللي بيعمله ،لكن برضه بيقوله “ماقدرش أستغنى عنك”.
واما قدروا ينجحوا مع بعض، وكمان كل عضو فيهم لما اشتغل لوحده سمعنا منه أغاني رومانسية حلوة، وأشهر واحدة جت على بالنا دلوقتي أغنية نور عينيك لمحمد نور.
وهنا بيكمل معانا العظماء والنجوم الكبار، بأغاي كانت علامات في مسيرتهم.
أحدث حقبة
دلوقتي أنت ممكن تحب في اللي مرتبط به بأغنية راب، متخيل؟ الدنيا اتغيرت وتقدر تسمع كل حاجة، وممكن نبتدي بحاجة هتخليك تحس بقيمة الأميرة اللي معاك وازاي حياتك اتغيرت من ساعة ما هي دخلتها.
بس برضه لسه موجود معانا نجومنا المفضلين وبيعملوا أغاني رومانسية جميلة بنسمعها.
وبرضه في فرق موسيقية كتير بس بشكل تاني غير الألفينيات، وهي الفرق المستقلة زي كايروكي ومسار إجباري وكمان شارموفرز، ومن أغاني مسار إجباري المميزة (cover) أغنية أنا هويت اللي اتشهروا به.
من الآخر عندك اختيارات كتير وفنانين أكتر، مالكش حجة في الخروج والأغاني في عيد الحب، وغير المقال ده، هتلاقي مقالات تانية عن عيد الحب وهنقولك تخرج فين أيًا كان الميزانية بتاعتك، وحتى في الهدايا جبنا لك اقتراحات كتير وحاجات برا الصندوق، مالكش حجة.