قاموس الأزواج للهروب من فخ هدية عيد الحب

بيهل علينا يوم عيد الحب والمجتمع بينقسم لتلاثة أقسام، أو بمعنى أصح ثلاثة أركان، ركن السناجل المحطوط عليهم وفي الغالب بيبقوا مجروحين وبيحاولوا في اليوم ده إهداء كل الحب اللي عندهم “للأخ والأخت والصديق والجار وعم عبده مفيش مانع”، وركن الحبيبة ودول مش محتاجين لإنهم من غير حاجة هتلاقي قلوب طايرة من غير مجهود، الخوف بقى على الركن الأخير ركن المتزوجين وخاصة الأزواج، ياترى بيقولوا إيه اليوم ده؟ وازاي بيحاولوا يخلعوا من الهدية؟

احنا في نص الشهر

بيبدأ بمقدمات في الأول ومش بيبقى عارف يجبها ازاي وبعدين تلاقيه بيرمي لك كلمة”احنا في نص الشهر” ويقفل بيها أي كلام بعد كده، اللي هو نزق مع بعض العيشة بقى.

هو أنا مستني الفلانتين علشان أحبك؟

هو أنا مستني يوم الفلانتين علشان أحبك؟ أنا بحبك كل يوم.. ودي مرحلة متقدمة في فن التثبيت لسه رجالة كتير ماقدرتش توصلها، ونتمنى رجالة توصل لها علشان مايبقاش لا هدية ولا كلمة حلوة.

كيلو كباب أبرك

هنا الزوج الأصيل يتقمص شخصية إبراهيم زوج يسيرية في أحلى الأوقات، لما طلبت منه ورد وكان بالنسبه له أن كيلو كباب أبرك منه أهو ناكل ونأكل العيال.

أنا الهدية

وده نوع من أنواع الخلعان بس بالذوق والشياكة، بينم عن ذكاء الزوج وامتلاكه بعض الأدوات الثعبانية وبتحتار الست المسكينة بعدها، ترد بإيه، فبتسكت وبتروح الهدية.

احنا بتوع الكلام ده؟

وهنا الست بتفضل في حيرة كونية على ترجمة كلمة “احنا بتوع الكلام ده” ، كلام إيه بقى اللي هما مش بتوعه؟ وممكن الزوج يستبدلها بكلمة “مالناش دعوة يا محي” على سبيل الإيفيه، وبرضه هيهرب من الهدية.

احنا كبرنا على الهدايا

وهنا بقى للأسف الدخلة دي تصنف تحت دخلة الغشومية، وهتتسبب لك في إسطوانة هتفضل تعايرك بها الست العمر كله، وفي نفس الوقت مش هتفلت من الهدية يا حلو.

الفلانتين ده نظام اجتماعي فاشل

ودي بقى دخلة المثقف اللي بيقعد يحلل كل موقف، ويدخلك الموضوع في إنه بدعة وقلدناها من الغرب ومش بتشبه العرب، واحنا بنقلدهم عمياني ولو سبته يتكلم شوية هتلاقيه دخلك في أزمة فقدان الهوية.

كل يوم في حبك عيد

ودي شبيهه بالرسائل اللي كانت بتيجي لنا أيام موبايل النوكيا، بس لو الست ناصحة ترد وتقوله، بما إن كل يوم في حبي عيد خلال هات كل يوم هدية بقى، وممكن ننهي الفقرة معاك بجملة “أنتي أجمل هدية” صحيح تقليدية وكانت بتتكتب على كروت المعايدات زمان بس بنسمعها برضه.

آخر كلمة: ماتفوتوش قراءة: العشاق يمتنعون: أفلام للسناجل بتقدم معاني مختلفة للحب