في موجات الحر اللي زيّ دي، بندور على حلول مختلفة نقلل بيها تأثير الحر على جسمنا على قد ما نقدر، وغصب عننا بنتعرض لضربة الشمس في الأوقات دي، وللأسف ممكن نصاب بيها من شدة الحر والرطوبة حتى في الضل، لكن في نصائح بتساعد على تجنب الإصابة بضربة الشمس أو على الأقل بتقلل شوية من حدتها، وفي حاجات بسيطة ممكن نبقى بنعملها من غير ما نكون عارفين إنها بتزود من فرص الإصابة بيها، تعالوا نعرف الاتنين علشان نحمي نفسنا من ضربة الشمس، وكمان نعرف طرق لعلاجها لو اتعرضنا لها، لإنها للأسف ممكن تؤدي للموت لو ماتمش علاجها في وقت قصير.
في البداية، ازاي تعرف إنك مصاب بضربة شمس؟ أعراضها بتكون ارتفاع درجة حرارة الجسم، صداع شديد، نقص شديد في التعرق، إحمرار وجفاف الجلد، إحساس شديد بالإرهاق والتعب، سرعة ضربات القلب، صعوبة في التنفس.
طرق الحماية
- شرب المياه أكتر من العادي، لإن ضربة الشمس تأثيرها الأول إنها بترفع درجة حرارة الجسم، لو حافظت على ترطيب جسمك بالمياه هتقلل فرصة الإصابة بضربة الشمس.
- تجنب شرب الكافيين في أي مشروبات حتى لو مشروبات باردة، لإنه الكافيين بيساعد على فقد سوائل الجسم وزيادة الجفاف.
- استخدام Sunblock أو واقي للشمس ممكن يفيد في الحالة دي لكن مع الحرص على تقليل وقت التعرض للشمس أو البقاء في أماكن مفتوحة.
- يفضل يكون معاك شمسية أو إنك تلبس كاب، هيساعد كتير في حماية رأسك من الشمس.
- شرب سوائل مسكرة وعصاير طبيعية بشكل كبير، حوالي 4 لتر في اليوم في درجات الحرارة المرتفعة زيّ الأيام دي.
- البعد عن بذل أي مجهود بدني عالي لإن ده في الطبيعي بيرفع درجة حرارة الجسم.
- احرص على إنك تكون لابس هدوم خفيفة ومريحة وفضفاضة وألوانها فاتحة.
طرق العلاج
لو الإصابة خفيفة وأعراضها بسيطة ومش حاسس بتعب شديد يستاهل إنك تتنقل مستشفى، ممكن تعمل الخطوات دي أول ما تحس بتعب.
- أولهم طبعًا ابتعد عن الشمس فورًا أول ما تحس بتعب وانتقل لمكان بارد.
- تركيز تهوية على المصاب زيّ المروحة.
- عمل كمادات باردة على الجسم والرأس بالأخص، أو الاستحمام بمياه باردة والحرص على إن المياه تكون جارية خصوصًا على الرأس.
- ممكن تبقى طريقة بسيطة جدًا اتعلمناها من أجدادنا، لكنها فعالة بشكل كبير، وهي ربط الرأس بقطعة قماش لمدة دقايق بسيطة.
- تغطية الجسم بملابس مبللة، ودي شبه الكمادات لكن بشكل أكبر، مع تدليك الجلد لتنشيط الدورة الدموية.
- تعويض جسم المصاب بسوائل ومياه لتعويض الجفاف وضبط درجة حرارة الجسم.
- لو الأعراض أتقل وأخطر، لازم تنقل المصاب لمستشفى علشان يتلقى الإسعافات اللازمة.