فنان سابق لعصره بألحان مميزة وأغاني بنحس باختلافها وجمالها لما نسمعها لحد دلوقتي ونسأل إزاي الفن ده اتعمل من أكتر من 60 سنة؟ مش بس بألحانه اللي غيرت كتير في تاريخ الموسيقى العربية سواء بأغانيه أو أغاني أكبر وأشهر مطربين مصر، وكمان بأفلامه اللي كان بيمثلها بمنتهى الخفة واللطف، وبإنتاجه اللي خلى الموسيقي في مصر تسبق كتير من الدول، وبالسبق الإنتاجي اللي حققه بشركة الإسطوانات “مصر فون” الأولى والوحيدة وقتها في مصر، اللي ضربت الشركات الأجنبية في السوق وباعت بأرخص من أسعار كل الشركات الأجنبية، كل ده خلاه فنان مميز وأيقونة في تاريخ الفن المصري والعربي، وبمناسبة الذكري الـ 54 على وفاته، تعالوا نفتكر أغاني مميزة لمحمد فوزي لكن مش كتير يعرفها.
محمد فوزي قدم أغاني تعتبر علامات في الموسيقى المصرية وأشهرهم “طير بينا يا قلبي”، اللي كانت من فيلم “دايمًا معاك”، اللي شاركته في بطولته الفنانة فاتن حمامة، واللي موسيقى الأغنية تعتبر لحد دلوقتي علامة مميزة أول ما نسمع مقدمتها بنعرفها، وأغنية “مال القمر”، و”حبيبي وعنيا”، وأغنية “شحات الغرام”، اللي تعتبر أشهر دويتو غنائي في السينما المصرية القديمة، اللي شاركته فيها الفنانة ليلى مراد، كمان كان أول من غنى للأطفال وغنى معاهم، وقدم أغاني مشهورة ومعروفة لحد دلوقتي زي “ماما زمانها جاية”، “ذهب الليل”، وغيرخهم، لكننا عايزين نركز على الأغاني اللي مخدتش حقها في الانتشار أو مش ناس كتير تعرفها.
فين قلبي
أغنية مش كتير يعرفوها، لحنها خفيف هتحس إنه بيعلق معاك رغم بساطته، الأغنية كانت من فيلم “يا حلاوة الحب”، اللي برضه يعتبر مش مشهور بالنسبة لناس كتير زي باقي أفلام محمد فوزي.
دلوني يا أهل الهوي
كانت من فيلم صاحب العمارة، وده من أقدم أفلام محمد فوزي واتعمل سنة 1948.
اللي يهواك اهواه
الأغنية كانت من فيلم دايمًا معاك، وتعتبر مخدتش حقها في الانتشار وناس كتير متعرفهاش.
فاطمة وماريكا وراشيل
الأغنية على اسم الفيلم اللي اتعملت فيه، الفيلم كان بيقدم فيه فوزي دور شاب غني طايش بيحب كذا بنت لكنه في النهاية بيجبر إنه يتجوز لمصالح عائلية لكنه هيحب اللي هيجبر على جوازها. فيلم خفيف بننصحك تشوفه لو بتحب الأفلام الرومانسية الكوميدية الخفيفة.
ابتهالات محمد فوزي
ناس كتير متعرفش إن محمد فوزي كمان قدم ابتهالات، وكانت مميزة بصوته اللي كان فيه نوع من القوة فيها، اللي قدر إنه يخليه لايق عليها عكس البساطة والخفة في أغانيه العادية.