متعودين مع كل حلقة من حلقات Roam Egypt إننا نشوف مصر بشكل وعيون مختلفة، بنشوف الأماكن بشكل غير اللي احنا متعودين عليه، وفي الحلقة دي مش بس هيقولوا فيها عن أماكن نروحها ونزورها في دهب، لأ دول هيحلوا مشكلة دايمًا بنتحط فيها وهي هنقعد فين لما نسافر؟ وهناكل فين؟ وده لإننا مش بنحب ناخد الريسك خصوصًا لو المكان ده أول مرة نزوره، بس المرة دي هناخد ترشيحاتنا من ناس غاويين اكتشاف أحسن الأماكن في كل حته في مصر.
أماكن ناكل منها واحنا هناك
دهب مليانة أماكن للأكل ومطاعم كتيرة، ولكن أكيد في محلات بتخذلنا ولكن الأماكن دي مش هتخيب ظنكم أبدًا زيّ Dai pescatori وRamez and Pula وRalph’s German Bakery وKing chicken وNamaste وAthanor pizzeria وShark Restaurant وChurchill’s وAli Baba Restaurant وZanooba slow cooking وRed Cat.
أماكن نقدر نقعد فيها هناك
كمان بنروح بعد ما نحجز في أماكن ولكن بنكتشف إن المكان مش قد كده بعد ما نروح، فدي أماكن هتبسطكم: Le Meridien Dahab وBedouin وJaz Dahabeya وTriana Resort وSwiss inn وNessima Resort وDyarna وDar Dhab وDahab lagoon village وpanda.
أماكن لازم نزورها واحنا في دهب
دهب من أكتر الأماكن المميزة اللي تقدر تروحها في مصر، هتقضي كام يوم فيها وسط الصحرا والجبال والمياه، وده غير إنها بتجمع بين جو البساطة وروح المدينة، يعني هتلاقي هناك الحياة البدوية بكل تفاصيلها وبساطتها من لبس ولهجة وكرم للضيافة، وفي نفس الوقت هنلاقي برضه روح المدينة سواء كافيهات ومطاعم وأماكن كتير تقدر تخرج فيها، ده غير رياضة التسلق والغوص اللي مش هتلاقي مكان أحسن من دهب علشان تعملوهم فيها وكمان تنبسط، وعلشان كده Roam Egypt جابت مجموعة من الأماكن اللي بتجمع بين كل ده هناك.
وادي جني – Wadi Gnai
مكان عبارة عن واحة صغيرة في وسط الصحرا والخضرة والأشجار والمياه، بيعتبر اختيار موفق للناس اللي بتحب رياضة التسلق، ومش بس كده، ده أنت تقدر تعمل في أكتر من نشاط منهم إنك تركب عجل أو جمال وأحصنه، وتاخد صور للصخور اللي بتحكي عن تاريخ المكان وبتعتبر على بعد 20 دقيقة بالعربية من Coachhouse.
الكانيون – Canyon
الكانيون أو الوادي الملون، المكان ده في المقام الأول معمول للناس اللي بتلاقي متعتها في التسلق لإن أشكال الصخور اللي بيتكون منها الوادي هتلاقيها مختلفة في الشكل والحجم، فهتلاقي منها السهل إنك تتسلقه بالأقدام، ومنها الصعب اللي بيحتاج لمعدات خاصة، يعني مناسب لأي حد.
الوادي الملون مش مجرد وادي، لأ ده عبارة عن متاهة متلونة بالأصفر والأرجواني والأحمر والأزرق والقرمزي والفضي والذهبي، هتتوه فيها، ومتصممة على نمط الدوامة اللي عينك تضيع فيها مجرد ما تبص لها لفترة طويلة، فيها تكوينات صخرية مرسومة كإنها لوحة من الطبيعة، وبرغم إن كل الصخور دي صلبة بس أشكالها اللي مليانة بالمنحنيات بتدي لك انطباع إنها حية وبتتنفس.
بلو هول – Blue Hole
أجمل مكان للغطس في مصر، وأكبر ثاني مكان في العالم للغطس، واللي يجذب الكثير من الغطاسين من جميع أنحاء العالم، يبلغ عمقه أكثر من ١١٠ متر من الجمال الخالص من الشعاب المرجانية والأحياء البحرية.
اللايت هاوس – The light house
بيعتبر مكان مناسب للغوص الليلي موجود في قلب مدينة دهب ويعتبر بمثابة الكورنيش، وفيه عدد كبير من المطاعم والمحلات التجارية.
ثري بولز – 3 Pools
اتسمى بالاسم ده لإنه بيحتوي على 3 حمامات سباحة من الشعاب المرجانية لها قاع رملي ذهبي ومليانة بالأسماك والسلاحف والقواقع الصغيرة، المسافة بينها وبين لاجون من 13 لـ15 كم، وبينها وبين الممشى السياحي 18 كيلو رايح جاي، تجربة غوص مميزة هتعيشها في المكان ده، غير إن عمقها مناسب للناس اللي بتخاف من الأعماق.
محمية أبو جالوم – بلو لاجون – Blue lagoon
محمية طبيعية موجودة في دهب ممكن نروحلها طريق لانش سريع في البلو هول لمدة ربع ساعة في المياه، وممكن كمان تروحها عن طريق الجمال أو حتى مشي، بتضم 165 نوع من النباتات من ضمنهم 44 نوع مش موجودين غير في المكان ده، بتتميز بالشعاب المرجانية وأسماك الزينة، ده غير إنها معمولة على النظام الكهفي الموجود تحت المياه واللي بيمتد عمقه لأكتر من 100 متر. فمحمية بلو لاجون من أجمل مناطق البحر الأحمر، ده غير إنها مناسبة جدًا للتخييم.
الكيفز – The caves
منطقة الكيفز على بعد خمس دقايق من الثري بولز والمميز فيها هي إن الشعاب المرجانية موجودة تحت الشاطئ على طول، واتسمت بال Caves لإن الشعب المرجانية كونت كهوف تحت المياه. والمنطقه دى تعتبر من الأماكن المميزة جدًا في دهب للسنوركلينج والغطس.